Baucau – Ohin loron, 31 Janeiru ida espesiál liu ba familia saleziana, tanba selebra solenidade san Giovanni Bosco; aman, mestre no fundadór Kongregasaun saleziana nian. Iha Parokia Sant’Ántonio Baucau, buat ne’ebé halo ema hotu haksolok hodi selebra festa don Bosco nian mak espiritu sinergia nian husi ema hothotu liuliu familia saleziana. Ema hothotu sente Don Bosco ninian, nune’e mak hothotu fó liman ba malu. Liuliu iha tinan ida ne’e komisaun orgnizadora fó responsabilidade ba eskola sekondaria (SMA 2) nu’udar koro ba Santa Misa, no eskola pre-secundaria (SMP 1) Tirilolo responsavel ba konsumsi. No Salezianu kooperador sira maske foin mak forma grupu maibé sira mós responsavel ba dekorasaun iha Igreja no fó liman ba hirak ne’ebé tein hodi haree meja ne’ebé foin-sa’e sira han.

Iha selebrasaun ne’e partispa husi ema wain, eskola hothotu iha Baucau laran no autoridade sivil no militar iha Buacau laran. Iha Santa Misa ne’e selebrante mak Pe. João da Costa, SDB ho ko-selebrante na’in ha’at. Iha Misa Pe. João iha nia omilia subliña kona-ba Don Bosco ninia misaun liuliu wainhira nia hahú ninia misaun iha Torino, katak Don Bosco hasoru situasaun ida ne’ebé politikamente no ekonomikamente difisil, ukun nain konsidera joven sira mak problema no estraga sidade. Don Bosco saran nia moris hodi salva foin-sa’e sira, ho politika ne’ebé mak nia uza mak politika ami Aman. Ninia omilia bazeia ba Estreia Retor Mor 2020 nian. Ikus liu nia fó hanoin ba ema hotu ne’ebé prezente atu tulun foin-sa’e sira liuliu valoriza sira nu’udar don Bosco hatudu.

Hotu tiha santa misa ema hothotu konvida ba iha kampu alegria/ S; Domingos Savio atu han meudia. Hotu tiha han meudia hahú abertura don Bosco Cup, no jogos ne’e sei hotu iha 25 Fevereiru 2020 ne’e, festa san Calisto Caravario nian.

(Lucia Pereira FMA)