Venilale – Selebra loron Don Bosco, Fundadór, Aman, Mestre, Belun foin-sa’e sira-nian, hahú ho preparasaun loron 9, tanba Venilale mak Parókia Saleziana ida. Iha loron sia nia laran ami reflete kona-ba saida mak Don Bosco hakarak nu’udar “outcome” ba ninia edukasaun: sarani di’ak no sidadaun onestu”, ne’ebé Reitór-Mor propoin iha ninia estréia ba 2020.

Iha komunidade, Irmán sira ba lee fali Don Bosco nia Surat sira hakerek ba FMA hanesan ita hetan iha Apéndise ba Konstituisaun FMA nian. Tanba iha tinan ne’e, komunidade edukativa hakarak hakle’an Sistema Preventivu, nune’e, Irmán sira buka atu hakle’an Don Bosco nia liafuan sira ne’ebé hakerek iha Surat Roma nian, iha opúskulu Sistema Preventivu nian, iha rekomendasaun sira seluk. Irmán ida-idak buka atu moris tuir Don Bosco nia rekomendasaun sira, hodi korrije an rasik, liuliu hahalok sira hasoru “amorevolezza”.

Iha vijília ba festa Fundadór nian, komunidade edukativa hetan oportunidade atu hakbesik an ba Sakramentu Peniténsia no Rekonsiliasaun nian. Agradese ba Pe. Abrão SDB, Pe. Carlos Fernandes SDB no Pe. Eligio Locatelli SDB, ne’ebé dispoin mai ami Sakramentu ne’e. Foin-sa’e sira molok, hakle’an Don Bosco nia mehi “Tali Tolu”, ne’ebé sira aprezenta mós iha kalan 30 Janeiru iha atraksi. Don Bosco nia mehi no selebrasaun penitensiál ho ezame konxiénsia nian bele tulun atu halo didi’ak konfisaun. Iha loron ikus novena nian ne’e mós, sira reza Vésperas hodi reflete ho modu espesífiku “sidadaun onestu”:

• Sai sidadaun onestu katak sai sidadaun ne’ebé barani ko’alia kona-ba justisa, katak foin-sa’e sira sai profeta lia-loos nian;
• Sai sidadaun onestu katak ita tenke eduka ita nia an, ita no foin-sa’e sira iba kompromisu polítiku no serbisu ba ema seluk. Iha Ami Aman husu ita  atu hanorin foin-sa’e sira nudar grupu atu sai protagonista ba ema hotu nia diak.
• Ita presiza eduka ita nia an no ita nia foin-sa’e sira iha onestidade, husi na’ok no atu hadook ita nia an husi korupsaun.
• Sai sidadaun onestu signifika mós eduka ita-nia an no foin-sa’e sira hotu atu tau matan bai ta-nia “uma komún” katak planeta rai.

Komunidade edukativa la hanoin de’it ba parte espirituál, maibé mós ba desportu no divertimentu, iha-ne’ebé ETV mane hetan prémiu datoluk. Iha loron 31 Janeiru loraik, FMA sira husi komunidade rua mós forma ekipa ida atu joga basket amizade nian ho ADMA no sira manán.

Iha kalan larista sira kumprimenta Irmán sira hotu ho sira-nia drama no knananuk. Hafoin ba “buona note”, Ir Jacinta Gusmão husu atu Irmán ida-idak fahe ba menina sira kona-ba saida husi Don Bosco mak dada sira atu sai “Saleziana” ka FMA. Kuaze Irmán hotu ko’alia kona-ba sasin ne’ebé sira haree husi Salezianu ka Saleziana sira, iha ksolok, iha moris ho foin-sa’e sira no envolvimentu iha apostoladu mak halo sira sente atrasaun ba vokasaun saleziana.

(JG)