Enkontru formativu animadora komunidade nian

 

Dili – Irmán konselleira inspetoriál no animadora sira komunidade nian, husi loron 5-6 Juñu, hala’o sira-nia enkontru formasaun hamutuk.  Tuir programa, iha loron 5 dedika ba formasaun hamutuk, ho tópiku rua: 1) Don Bosco no Eukaristia no 2) Animadora iha eskola Eukaristia nian. Loron 6 Juñu dedika ba outing hamutuk ba Railaku, hodi halo mós despedida ba irmán Marivic Sombrero ne’ebé remata ona knaar diretora nian iha Kailaku no sei ba Roma (Itália) atu hala’o knaar foun ba tinan ida.

Tema “Don Bosco no Eukaristia” foti husi Don Egidio Viganò  (susesór da-7 Don Bosco nian) nia hakerek ida iha tinan 1987. Kristu ne’ebé domina Don Bosco nia ezisténsia mak Kristu ne’ebé moris no prezente iha Eukaristia, “patraun uma nian”, sentru gravitasaun ne’ebé buat hotu konverje bá, “doadór moris nian”, “Maria”, Maromak nia Inan nia “Oan” no Kreda nian.
Don Bosco ko’alia beibeik kona-ba Jezús Eukaristia nia prezensa, mane loos no Maromak loos, ne’ebé tuun husi lalehan atu salva ita. Iha Jezús iha uma signifika bele bá nafatin hasoru Nia bainhira hakarak, partisipa iha Ninia Páskua, ko’alia ba Nia husi fuan ba fuan, husik Ninia Espíritu nakfilak ita ba misaun.
Ita-nia Aman doben nia moris, husi kedas sei labarik, no istória Oratóriu dahuluk nian mak knananuk loos ida ba Eukaristia. Ita bele haree ida-ne’e husi ninia foin-sa’e di’ak liu nia afirmasaun sira hanesan ida Domenico Savio nian: “Bainhira ha’u liu besik Nia (Jezús iha Eukaristia) ha’u la soe an de’it ba tahu laran atu fó onra ba Nia, ha’u sei soe an iha ahi-lakan boot, tanba hodi halo nune’e, ha’u hola parte iha ahi karidade ninia domin rohan-laek nian ne’ebé dudu Nia atu harii Sakramentu boot ne’e”.

Ita ba hanoin afirmasaun signifikativa liu Don Bosco nian kona-ba momentu tolu boot Eukaristia nian:

– Misa.“Sakrifísiu altár nian – Don Bosco hakerek–mak glória, moris, sentru kristianizmu nian”.Don Bosco nia uniaun ho Kristu iha selebrasaun Eukaristia to’o tutun aas liu. Nia preokupasaun pedagójika boot liu mak tulun joven sira atu kapata realidade sakramentál iha Misa: realdade mistériu paskál nian.

– Komuñaun.Don Bosco define Komuñaun eukarístika nu’udar eixu atu halo uma ni alala’ok sai di’ak, “koluna booot ne’ebé tahan mundu morál no espirituál”; “juventude nia sustentu folin liu”, “baze vokasaun sira-nian”.
– Adorasaun.Konxiénsia kona-ba Jezús nia prezensa moris nian iha Óstia konsagrada sai estímulu ba atitude adorasaun nian ho konvikasaun. Maski ne’e karakterístika piedade katólika iha Don Bosco nia tempu, nia hatene motiva foin-sa’e sira ba ninia valór pedagójiku no ba ninia kbiit atu santifika.
Iha “Buonanotte” ida Don Bosco insiste ho konviksaun ba nia oan sira: “La iha buat ida ne’ebé demóniu ta’uk liu duké prátika rua ne’e: Komuñaun ne’ebé halo didi’ak no vizita frekuente ba SS. Sakramentu. Imi hakarak Na’i halo ba imi grasa wain? Imi vizita Ninia beibeik. Imi hakarak halo uitoan? Imi vizita dalaruma de’it “.

Pergunta mai ita mak ne’e: “sá fatin mak mistériu no selebrasaun eukarístika okupa ohin, iha ita-nia projetu edukativu sira?”

Don Bosco nia espíritu sentra tomak iha Jezús-Eukaristia, no husi ne’e suli mai ahi “da mihi animas”. Sentralidade Kristu nian iha ita-nia espiritualidade moris nu’udar sensibilidade estraordinária kontemplasaun no amizade nian ba Eukaristia.  Iha nia ita selebra eventu paskál sira, valós aas liu no definitvu ba ita-nia salvasaun.

Don Bosco iha ninia asaun apostólika lori foin-sa’e sira ba Eukaristia. Ita bele haree ne’e momoos iha biografia foin-sa’e oratorianu sira Don Bosco hakerek: Domenico Savio, Francesco Besuco, Michele Magone. Nia lori foin-sa’e sira ne’e ba konxiénsia fiar nian no amizade konvivénsia nian ho Jezús Kristu iha Eukaristia.

Atitude fundamentál ne’e ezije, kuidadu pedagójiku ba momentu eukarístiku neen:

• Konversaun: se la iha konxiénsia kona-ba salan sei la komprende Kristu nu’udar sentru no oinsá ita labele moris lahó Kristu;
• Naroman husi Maromak nia Liafuan: iha Evanjellu nia roman de’it mak ita hetan resposta válida va problema sira todan liu moris nian;
• Konxiénsia kona-ba Kristu nia prezensa reál iha Aliansa Foun;
• Komuñaun Kristu nia isin, nu’udar knuuk ba ema foun nia moris, bee-matan konviksaun kle’an nian no enerjia atu moris ho barani nu’udar ema sarani;
• Misaun: sai Kristu nia isin iha mundu ezije empeñu loroloron partisipasaun nian ba Ninia atividade salvasaun nian, halo joven sai apostólu ba maluk sira;
• Amizade adorasaun nian ho dimensaun atu kasu salan. Don Bosco fó importánsia boot atu iha Jezús besik, iha uma, ba ita-nia dispozisaun, “Emanuel”. Husi Jezús ita hetan kbiit atu manán aat hotu no la’o ba oin iha dalan di’ak nian.

Parte ikus formasaun animadora sira-nian dedika ba reflesaun no fahe iha grupu no fahe ba malu naroman no dalan oinsá haburas ba beibeik konviksaun importánsia Eukaristia nian no tulun malu iha komunidade no apostoladu atu halo moris sai Eukaristia.