Papa Francisco nia katekeze

Iha kuarta, 4 Juñu, iha ema rihun 40 nia oin halibur iha Prasa S. Pedro, Papa Francisco foti fali katekeze kona-ba don Espíritu Santu nian. Nia ko’alia kona-ba don piedade nian. Nia hateten katak dalabarak ema komprende sala don ida-ne’e eh konsidera don ne’e ho modu superfisiál. Papa Francisco esplika katak don piedade nian la idéntiku ho sentimentu kompaixaun ba ema ruma, maibé indika pertensa ba Maromak no ligasaun kle’an liu ho Maromak,  ligasaun ida ne’ebé fó sentidu ba moris.

Asesu Katekeze ho lia-portugés

Ligasaun ne’e “Labele komprende nu’udar devér eh impozisaun ida. Maibé, relasaun ida moris ho fuan: ita-nia amizade ho Maromak, ne’ebé Jezús hariak mai ita, amizade ne’ebé muda ita-nia moris no hakonu ita ho entuziazmu, ksolok.”

 

No se don Espíritu Santu nian ida-ne’e haburas relasaun no komuñaun ho Maromak, tempu hanesan tulun dirije domin ne’e mós ba maun-alin sira. Hodi halo nune’e, buat ne’ebé book ema mak sentimentu piedade nian, la’ós pietizmu.

“Tanba sá mak ha’u la dehan pietizmu? Tanba ema ruma hanoin katak iha piedade mak taka matan no halo oin santu nian. Halo an katak nia santu ida. Maibé ida-ne’e la’ós don piedade. Envezde ne’e, buat ne’ebé halo ita iha kbiit atu haksolok ho ema ne’ebé haksolok, tanis ho ema ne’ebé tanis, besik ba ema ne’ebé mesak eh laran susar, korrije ema ne’ebé iha salan, konsola ema ne’ebé laran lahakmatek, simu ema ne’ebé iha nesesidade. Iha relasaun metin liu entre don piedade no laran-maus nian ne’ebé halo ita sai hakmatek, iha dame ho Maromak no tau an ba servisu ba ema seluk iha laran-maus”.

Francisco taka katekeze hodi husu Maromak don Espíritu Santu nian ida-ne’e, atu ema bele manán ninia laran-ta’uk no ninia inserteza sira no sai sasin ksolok Maromak nian no Nia domin nian, hodi adora Na’i no serví maluk sira. “Atu Nia haraik ba ema hotu don piedade ida-ne’e”.