Venilale – Komunidade Santa Maria Mazzarello hamutuk ho menina koléjiu tomak selebra Domingu Maromak nia Liafuan tuir Amu-papa nia hakaran ne’ebé monu iha Domingu Datoluk Tempu Komún. Hanesan Amu-Papa hakerek iha Aperuit Illis, 7: “Iha relasaun kle’an entre Sagrada Eskritura no sarani sira nia fiar. Hodi hatene katak fiar mai husi  rona no rona nia sentru mak Maromak nia Liafuan (kf. Rm 10, 17), husi ne’e mai urjénsia no importánsia ne’ebé sarani sira tenke fó ba rona Na’i nia Liafuan, iha asaun litúrjika nune’e mós iha orasaun no reflesaun pesoál sira”.

Nune’e, iha  Selebrasaun ne’ebé hahú kedas iha sábadu (25 Janeiru) loraik, ami reza Rozáriu ho Maromak nia Liafuan. Hafoin iha kalan halo jogu oioin hanesan “fera ulun” hodi forma fraze, kadi kakutak hodi temi autór sira naran iha Bíblia (korrente naran nian) no ikus liu kada grupu dramatiza tópiku kapítulu balun iha Biblia ne’ebé grupu idak-idak simu.

Iha Domingu loraik, halo selebrasaun ho Maromak nia Liafuan hodi entroniza Maromak nia Liafuan (Evanjeliáriu) no reflete hamutuk liuliu konaba Dalan Emaus nian. Molok selebrasaun ne’e Irmán Diretora Komunidade nian fó hanoin atu hadomi no respeita nafatin  Maromak nia Liafuan iha moris loron loron.

Selebrasaun sei kontinua ho kompetisaun lee Maromak nia Liafuan tuir turma klase nian iha semana ne’e nia laran. Molok ne’e, Ir Jacinta Gusmão fó uluk ona input kona-ba servisu leitór/a Maromak nia Liafuan nian.

(Alice Filipe FMA)