Dili – Formasaun nia finalidade mak halo ema nia-an tomak sai tasak neineik-neineik to’o konfigurasaun ho Kristu, Aman nia Apóstolu tuir projetu moris nian ne’ebé  hakerek ona iha Konstituisaun. Ba “Filhas de Maria Auxiliadora”, formasaun iha perspetiva kontinuidade nian no tuir estasaun ida-idak moris nian. Tan ne’e mak, ohin FMA na’in 23 halibur hamutuk atu fó tempu ba formasaun hamutuk tuir itineráriu formativu grupu irmán perpétua sira “segunda idade adulta”. Ba tinan ne’e atensaun fó liu ba aspetu relasionál.

Iha tema ohin nian irmán sira reflete kona-ba Surat sirkulár husi Kongregasaun ba Vida Konsagrada no Apostólika “Rallegratevi” no konfronta ho “Instrumento de Trabalho” ba Kapítulu Jerál XXIII. Ho modu espesífiku sira reflete no partilla kona-ba parte daruak surat Rallegratevi nian katak, “Konsolasaun”. Maromak bolu ita atu sai konsolasaun ba ema seluk maibé uluknanai ita tenke esperimenta konsolasaun ne’e. Konsolasaun ne’ebé ohin Maromak hakarak fó mai ita ko’alia kona-ba laran-sadia, hakohak ida ne’ebé fó forsa no pasiente iha prosimidade atu hetan lurón konfiansa nian; tanba ne’e nia la’ós konsolasaun ida superfisiál no sentimentál.

Modalidade enkontru mak estilu laboratóriu: irmán ida-idak uluknanai, ba lee no reflete pesoalmente dokumentu rua ne’e hafoin fahe iha grupu no ikusmai aprezenta ba asembleia indikadór ruma atu moris tuir Papa Francisco nia konvite ba konsagrada/u sira no Kapítulu Jerál nia interpelasaun ba FMA sira.

Irmán Paola Battagliola ne’ebé fasilita enkontru ne’e, fahe irmán sira ba grupu tolu no konvida grupu ida-idak atu identifika indikadór ruma atu oinsá moris konsagrasaun ho laran lahakmatek/inkietude ba Maromak no ba maun-alin sira hodi sai husi an rasik no bá hasoru maun-alin sira nia nesesidade.

Indikadór atu moris ba Maromak no haklaken Nia mak FMA sira-nia disponibilidade ba oportunidade no okaziaun hotu atu haklaken Evanjellu, liuliu ho prezensa, tau-matan ba orasaun pesoál no komunitária hodi husik Maromak hasoru ita.

Indikadór atu sai husi mundanizmu espirituál, komodizmu no interese pesoál, karreirizmu no funsionalizmu mak moris simples no esensiál, konstánsia iha otimizmu iha situasaun hotu liuliu iha susar laran, no prontidaun atu husik knaar sira tuir obediénsia haruka.

Indikadór atu sai husi an rasik no husi komunidade atu hasoru ema seluk mak membru hotu moris iha komuñaun iha hanoin no hahalok iha moris loroloron nian no sai uma nakloke hodi simu ema hotu hanesan.

Indikadór atu haburas moris komunidade ba misaun mak fleksibilidade atu husik ho ksolok hanoin no projetu pesoál bainhira komunidade hili dalan seluk; aleinde ne’e, irmán sira hatene hatudu atensaun la’ós de’it iha momentu espesiál maibé iha moris loroloron no moris iha onestidade no prudénsia iha relasaun interpesoál sira.

Grupu ida halo rezumu indikadór hotu iha liafuan “ksolok”: “FMA sira ne’ebé moris ksolok iha relasaun ho Maromak hodi husik Nia hasoru ita; FMA sira ne’ebé moris ksolok iha komunidade hodi hatene simu no fó “ternura”; FMA sira ne’ebé moris ksolok hodi sai barani no “perigoza” hanesan profeta sira”.

Ikusnian FMA sira ne’e sei haka’as an atu kria komunidade iha-ne’ebé simu no fó konsolasaun, katak domin; atu, hanesan iha Mornese no Valdocco haburas relasaun sira ho oin konsolasaun nian ne’ebé hamanas fuan, halakan esperansa, naksira di’ak, bele haree ksolok atu habelar Maromak nia domin.