Fuiloro, 22 Janeiru 2020, Selebra Festa Beata Laura Vicuña nian iha komunidade, ho partisipasaun menina Koléjiu no Irmán sira ba orasaun dadeer, Eukaristia  hamutuk agradese ba Beata Laura Vicuña nia Santidade. Misa ne’e prezide husi Padre Venancio Fatima Freitas SDB, iha omilia nia foka liu ba pontu importante dehan: Laura nia Santidade mak halo buat hotu iha tempu loos. Iha tempu estuda nia fokus ba estuda, iha tempu halimar nia halimar, tempu serbisu nia serbisu. Ba Laura buat hotu hotu nafatin halo ho konxiénsia iha tempu no fatin loos, ne’e mak SANTIDADE.

Iha lokraik hahú ho Novena ba Don Bosco iha kapela Salesiano nian, ho tema “ Ami Aman” foti husi Estreia Reitór-Mor nian iha tinan 2020.

Iha kalan Sr. Fernanda Kalçona, FMA,  nu’udar Misionária Timor oan ne’ebé fahe nia esperiénsia iha rai Misaun liuliu iha rai Áfrika ho situasaun diferente  ba menina Koléjiu sira ne’ebé hamutuk 116.  Menina sira hotu ho entusiazmu ho atensaun rona kona ba rai Áfrika ne’ebé  moris simples e kiak  maibé mós riku ho kultura hahíno agradese ba Maromak ho tipu dansa nian ne’ebé úniku.

(Ines Bartolo)