Regina Coeli – 1 Juñu 2014

 

Maun no biin-alin sira, bondia!

Ohin, iha Itália no iha País seluk, selebra Axensaun Jezús nian, akontese loron haatnulu liutiha Páskua. Apóstulu sira nia Hahalok konta epizódiu ne’e, Na’i Jezús nia haketak an finál husi Ninia dixípulu sira no husi mundu ne’e (kf Apóst 1,2.9). Evanjellu Mateus nian fali, relata Jezús nia mandatu ba dixípulu sira: konvite atu la’o, atu bá no haklaken ba povu hotu Ninia mensajen salvasaun nian (kf Mt 28,16-20). “La’o”, eh di’ak liu, “bá” sai liafuan xave festa ohin nian: Jezús bá hasoru Aman no komanda dixípulu sira atu bá hasoru mundu.

Jezús bá, sa’e ba Lalehan, katak fila ba Aman ne’ebé haruka Nia mai mundu. Nia halo ninia serbisu, oras-ne’e fila ba Aman. Maibé la’ós separasaun ida, tanba Nia hela nafatin ho ita, ho forma foun ida. Ho Ninia axensaun, Na’i moris-hi’as dada Apóstolu sira nia matan – no ita-nia matan mós – ba Lalehan leten aas bá atu hatudu ita-nia dalan nia rohan katak Aman. Nia rasik hateten katak nia bá prepara fatin ida iha Lalehan. Maski nune’e, Jezús hela prezente no hala’o obra iha akontesimentu sira istória umana nian ho Ninia Espíritu nia kbiit no don sira; Nia besik mai ita ida-idak: maski ita la haree Nia ho matan sira, Nia iha! Nia akompaña ita, kaer ita-nia liman no foti sa’e ita bainhira ita monu. Kristu moris-hi’as besik ba sarani sira ema persege no diskrimina; besik ba mane no feto ida-idak ne’ebé terus. Nia besik mai ita hotu, ohin mós Nia iha ne’e ho ita iha prasa ida-ne’e; Na’i horik ho ita! Imi fiar buat ne’e? Entaun ita dehan hamutuk: Na’i horik ho ita!

Jezús, bainhira fila hikas ba Lalehan Nia lori prezente ida ba Aman. Prezente ida-ne’ebé? Ninia kanek sira. Ninia isin sai furak liu, lahó fitar sira, lahó kanek sira flajelasaun nian, maibé rai hela kanek sira. Bainhira Nia fila hikas ba Aman Nia hatudu kanek sira no dehan: “Aman haree mai, ne’e mak folin perdaun nian ne’ebé Ita haraik”. Bainhira Aman hateke ba Jezús nia kanek sira Nia perdua nafatin, la’ós tanba ita di’ak, maibé tanba Jezús selu tiha ona mai ita. Hodi hateke Jezús nia kanek sira, Aman sai laran-sadia liután. Ne’e mak Jezús  nia serbisu boot iha Lalehan ohin: hatudu ba Aman perdaun nia folin, Ninia kanek sira. Ne’e buat furak ida ne’ebé dudu ita atu la ta’uk atu husu perdaun; Aman perdua nafatin, tanba hateke ba Jezús nia kanek sira, hateke ba ita-nia salan  no perdua nia.

Maibé Jezús prezente mós liuhusi Kreda, ne’ebé Nia haruka atu hanaruk Ninia misaun. Jezús nia liafuan ikus ba dixípulu sira mak orden atu bá: «Imi bá no halo povu hotu sai dixípulu» (Mt 28,19). Ne’e mandatu presizu ida, la’ós fakultativu! Komunidade sarani mak komunidade ne’ebé “sai”, “bá” daudaun. Liután, Kreda moris hodi “sai”. No imi sei dehan: maibé komunidade sira klauzura nian? Sin, sira mós, tanba sira nafatin “sai” ho orasaun, ho fuan nakloke ba mundu, ba Maromak nia orizonte sira. No katuas-ferik sira, moras sira? Sira mós, ho orasaun no uniaun ho Jezús nia kanek sira.

Ba Ninia dixípulu-misionáriu sira Jezús dehan: «Ha’u hamutuk ho imi loroloron , to’o mundu nia rohan» (v. 20).  Mesmesak, lahó Jezús, ita labele halo buat ida! Iha obra apostólika la to’o ita-nia forsa sira, ita-nia rekursu sira, ita-nia estrutura sira, maski nesesáriu. Lahó Na’i nia prezensa no Ninia Espíritu nia kbiit ita-nia serbisu, maski organiza di’ak, rezulta la efikás. Nune’e ita bá atu dehan ba ema sira sé mak Jezús.

No hamutuk ho Jezús, Maria ita-nia Inan akompaña ita. Nia iha ona Aman nia uma, Liurai-Feto Lalehan nian no nune’e mak ita invoka nia iha tempu ne’e; maibé tanba Jezús horik ho ita, la’o ho ita, nia mak Inan esperansa nian.