Venilale  – Iha 20 Janeiru 2020, ho ksolok komunidade Maria Auxiliadora Venilale simu madre Fernanda, misonária iha África do Sul ne’ebé mai, atu fahe ninia esperiénsia misionária; Madre Fernanda to’o iha komunidade ida ne’e iha loron 18 fulan Janeiru kalan. Loron tuir mai, dia 19 madre fahe ninia esperiénsia ho irman sira iha komunidade liuhusi power point, nia dehan: “iha moris loroloron maski nakonu ho servisu oin-oin maibé nafatin iha tempu atu halo orasaun komunitaria; orasaun no vida komunidade mak suporta no tulun makas atu lori misaun ba oin maski ho tempo ne’ebé limitadu liu”. Iha dia 20 dader  tuku 09:00 madre hasoru pre-aspirante no aspirante sira, hodi fahe mos ho sira esperiénsia misionária iha rai África. Iha lokraik tuku 03:30 madre ba orfanatu atu koalia no hatudu power point ba sira kona ba madre nia esperiénsia iha misaun África; Labarik sira simu madre ho ksolok hodi hananu knananuk benvinda nian, iha tempu hanesan grupu infansia misionária sia mos marka prezensa.

Depois de madre fahe ninia esperiénsia no hatudu foto, mosu sentimentu no impresaun husi ouvinte balun:

1. Ir. Virgilia Gaio:

• Hau sente kontente no apresia ba madre ninia aten brani atu sai misionária ne’ebé bele mai fahe mai ami nasaun seluk nia moris no kultura.
• Challenge atu bele sai husi an rasik atu bele fó an liu tan iha misaun.
• Ho ne’e maski hau la ba rai misaun maibé espiritualmente reza no halao knaar simples sira hodi oferese ba misionária sira iha rai misaun.

2. Formande sira:

Ami haksolok no agradese ba madre ne’ebé mai fahe esperiénsia ho ami kona ba misaun ne’ebé madre hala’o iha África; hodi haree ba esperiénsia hirak ne’e maski ami la ba rai misaun, maibé dezafia no fó hanoin mai ami atu halao didiak ami nia knaar ho responsavel. Obrigada madre ba lia menon ne’ebé fó mai ami  dehan:“ Wainhira Maromak bolu o keta tauk atu hatan”

3. Orfaun no OPIAM: Ami sente kontente hodi haree maluk sira iha África, ami sei reza no oferese ami nia servisu loroloron nian ba sira.

Obrigada barak madre Fernanda, ba ita nia prezensa nudar misionária adgentes iha ami nia komunidade hodi fahe esperiénsia furak kona ba misaun, ami promete orasaun.

Ir.Cesarina Joana Marques Correia.