Papa Francisco iha Angelus 19 Janeiru 2020

Maun no biin-alin sira, bondia!

 

Domingu daruak Tempu Ordináriu tau ita iha kontinuidade ho Epifania no ho festa Jezús nia Batizmu nian. Pasajen evanjélika (kf. Jo 1,29-34) sei ko’ali amai ita kona-ba Jezús nia manifestasaun. Defaktu, depoizde simu batizmu iha mota Jordão, Espíritu Santu ne’ebé tun ba Nia konsagra nia Aman Lalehan nia lian proklama Nia nu’udar Maromak nia Oan  (kf. Mt 3,16-17 no par.). Evanjelista João, diferente ho sira na’in tolu seluk, la deskreve eventu, maibé propoin mai ita João Batista nia sasin. Nia mak Kristu nia sasin dahuluk. Maromak bolu nia no prepara nia bai da-ne’e.

Batista labele hapara hakaran ne’ebé dudu atu fó sasin ba Jezús no deklaraa: «Ha’u haree no ha’u fó sasin» (v. 34). João haree buat ruma ne’ebé boot liu, katak Oan ne’ebé Maromak hadomi solidáriu ho ema maksalak sira; no Espíritu Santu halo nia komprende buat foun ne’ebé nunka mosu, mudansa boot loos  ida. Defaktu, enkuantu relijiaun hotu  ema mak oferese no sakrifika buat ruma ba Maromak, iha eventu Jezús , Maormak mak oferese nia Oan rasik ba umnaidade nia salvasaun. João manifesta ninia hakfodak no ninia konsentimentu ba novidade ne’ebé Jezús lori, liuhusi espresaun nakonu ida ne’ebé ita repete iha Missa: «Ne’e mak Maromak nia Bibi-Oan, ne’ebé kasu mundu nia salan!» (v. 29).

João Batista konvida ita atu hahú nafatin ita-nia dalan fiar nian; hahú hikas husi Jezús Kristu, Bibi-Oan nakonu ho mizerikórdia ne’ebé Aman haraik mai ita. Husik ita-nia an hakfodak ba Maromak nia hilin atu horik iha ita-nia parte, atu sai solidáriu ho ita maksalak sira, no atu salva mundu husi aat hodi responsabilia tomak.

Mai ita aprende husi João Batista atu keta hanoin katak ita hatene ona Jezús, atu hatene buat hotu kona-ba Nia (kf. v. 31). La’ós hanesan ne’e ida. Mai ita para iha Evanjellu, karik hodi kontempla íkone ida Krsitu nian, “Oin Santu” ida. Mai ita kontempla ho matan maibé liuliu ho fuan; no mai ita husik Espíritu Santu hanorin ita, ne’ebé iha ita laran dehan: Nia duni! Nia mak Maromak nia Oan halo an sai bibi-oan, saran an tan domin. Nia, Nia mesak lori, Nia mesak terus, kasu ita ida-idak nia salan, mundu nia salan, no ha’u-nia salan mós. Hotu-hotu. Nia lori iha nia An no hasai husi ita, atu ita livre hikas fali, la’ó sona aat nia atan sira. Loos duni, ita sei ema maksalak kiak sira, maibé la’ós atan, lae, la’’os atan: oan sira, Maromak nia oan sira!

Atu Virjen Maria harohan mai ita kbiit atu fó sasin ba nia Oan Jezús; atu haklaken Nia ho ksolok ho moris ida livre husi aat no liafuan ida nakonu ho fiar ne’ebé hatene hakfodak no agradese.