Dili – Hahú 17 Janeiru loraik to’o iha 18 meuidia, Irmán Juniora sira hamutuk nain 18 hala’o sira nia enkontru ho Me. Alma. Tema ba enkontru ida ne’e mak ko’alia kona ba “akompañamentu bazeia ba livru Tobias nian”.

Iha 17 loraik enkontru hahu ho introdusaun badak husi Me. Alma, bazeia ba Evanjellu Marcos, ne’ebé ko’alia kona ba Jezús bolu Simão no nia alin Andre. Husi bolun ida ne’e sira husik kedas sira nia serbisu no tuir Jezús. Husi sira nia enkontru ida ne’e troka sira nia moris baibain nian nu’udar peskador ikan nia ba peskadór ema nian. Hamutuk ho sira Jezús hahu nia moris publiku no hari’i komunidade foun. Bazeia ba Evanjellu ida ne’e, Madre fo hanoin ba ami atu hare fali ba ami nia moris hodi reflete: “Depois de profisaun troka ha’u nia moris troka ga lae?”

Loron tuir mai, kontinua kedas ho grupu hodi hakle’an kona ba livru Tobias nian (Tob. 5. 1-6.19) no hare oinsá simu akompañamentu no oinsá atu akompaña ema seluk. Iha ne’e ami deskobre karateristika sira kona ba akompañamentu nian. Akompañadór nia karakterístika mak: Hatene diálogu, laran metin, iha konfiansa, no hatene amizade, prudensia. nst. No mós Karakterístika husi ema ne’ebé simu akompañamentu mak :Loke an, pasiensia, rona.

Objetivu ba akompañamentu mak: akompaña ema hodi to’o finalidade no buka Maromak nia hakarak, hodi la’o hamutuk no tulun malu, nune’e bele hetan solusaun ba ninia problema. No nia vantajen mak sai husi nia an rasik, halo esperiénsia, hetan ksolok no sai buras iha domin, no sai disponivel ba lialos.

Lia menon ikus liu husi Me. Alma iha objetivu rua mak oinsá atu loke Bíblia no iha hakaran atu lee no mós fó importánsia ba akompañamentu grupu no pesoál.

Ho ksolok husi ami nia fuan ami hakarak agradese ba Me. Alma ne’ebé fó ona tempu, domin, matenek no ho pasiénsia atu gia no fó formasaun mai ami ne’ebé tulun tebes ami atu sai ema ne’ebé hatene simu akompañamentu no akompaña ema seluk. Obrigada barak ba Me. Alma, Madre sira hotu iha ami nia komunidade ida-idak ne’ebé fo oportunidade mai ami atu partesipa didi’ak iha ami nia formasaun ne’e no Madre sira ne’ebé prepara fatin no hahan ba ami durante loron hirak ne’e. Maromak fo bensaun wain. Obrigada barak

(Irmán Juniora sira)