Dili – Iha loron Sesta-Feira, 10-01-2020, Iha Komunidade Saun Jose Novisiadu-Comoro, Formande sira (Postulante-Novisa), halo laboratoriu ho tema “Preparasaun ba tinan 150 Institutu FMA”. Atividade ida ne’e hahu ho orasaun loke nian, hafoin kontinua kedas hodi rona Liafuan husi Madre Jeral ne’ebé hato’o iha loron 5/8/2019 nu’udar abertura ba tinan 3 preparasaun ba Selebrasaun tinan 150 fundasaun Institutu nian. Madre Yvone Reungoat subliña liu kona ba Maria nia prezensa ne’ebé kontinua la’o nafatin ho ita, nune’e ita soi atu agradese ba grasa no kmanek oioin ne’ebe ita simu ona. Hanesan Nain Feto entrega ba Maria Mazzarello iha Vizaun Borgoalto “a te le affido”, misaun ne’e kontinua la’o to’o ohin loron, liuhusi FMA ida-idak ne’ebé serbi ho espiritu Da Mihi Animas Coetera tolle.

               Atividade la to’o deit iha ne’e maibe ami mos haklean tema ida ne’e liuhusi Laboratoriu ne’ebe aprezenta oinsa ita nia Institutu hari no la’o to’o momentu ida ne’e hodi prepara ba tinan 150 fundasaun Institutu nian. Liuhusi Laboratoriu ida ne’e mos habo’ot ami nia laran manas ba Vokasaun Saleziana ne’ebé ami simu no haburas liutan ami nia domin ba Institutu liuhusi aktividade oioin ne’ebé Inspetoria oferese hodi servisu hamutuk ho ambitu formasaun nian. Ami agradese ba Madre nain tolu: Me. Esmeralda, Me. Evangelina no Me. Ermelinda da Silva ne’ebé akompaña ami durante atividade ne’e hahu to’o remata no ba mensajen furak sira ne’ebé Madre sira hato’o, fo korajen ba ami atu haklean liutan ami nia domin ba Institutu hodi prepara-an didiak ba Futuru liuhusi ami nia Etapa Formasaun nian. Obrigada.

(Postulante no Novisa)