Festa Maria Tulun-Na’in iha Santuáriu dedika ba nia

Fatumaka – Loron 24 Maiu mak loron solenidade ba Sosiedade S. Francisco de Sales (SDB), ba Institutu Filhas de Maria Auxiliadora (FMA ) no ba Institutu sekulár Volontárias de Dom Bosco (VDB), ba ADMA (Asosiasaun Devotu sira Maria Ausiliadora nian), no mós ba Família Saleziana tomak.

Iha Timor-Leste entre Santuáriu nasionál rua ne’ebé iha, hotu-hotu dedika ba Maria, ida mak Na’i-Feto Aitara  iha Soibada no ida mak Santuáriu Maria Auxiliadora nian iha Fatumaka.

Nune’e mak membru sira Família Saleziana Timór nian nune’e mós sarani seluk devotu, loron ne’e halai ba Santuáriu Maria Auxiliadora iha Fatumaka atu venera sira-nia Inan, Mestra, Gia no Tulun-na’in.

Selebrasaun iha Fatumaka hahú iha loraik tuku 2.00 ho prosisaun husi aldeia Kairiri to’o iha Santuáriu ho prezensa boot foin-sa’e sira husi eskola saleziana sira, ho grupu kategoriál oioin, ho asosiasaun oioin iha Família Saleziana no mós husi sarani barak.

Selebrasaun Eukaristia prezide husi padre provinsiál João Paulino no amluluk konselebrante SDB na’in 18. Iha ninia omilia, padre provinsiál uluknanai aprezenta kumprimentus husi Reitór-Mor foun padre Ángel Fernández Artime ba Família Saleziana tomak, husi padre Pascual Chavez, reitór-mor antigu, husi padre Andre Wong, rejionál antigu ne’ebé oras-ne’e simu knaar foun iha Terra Santa nu’udar reitór, no husi D. Carlos Belo ne’ebé prepara hela dokumentasaun ruma ba festa bisentenáriu Don Bosco nian liga ho atividade sira ne’ebé sei hala’o iha Vizitadoria Saleziana ITM.

Komenta kona-ba leitura Evanjellu ohin nian, kona-ba Kazamentu iha Kaná Galileia nian, selebrante foka Maria nia prezensa nu’udar Tulun-Na’in ne’ebé matan-moris hodi haree ema nia difikuldade no hato’o ba Jezús: “Sé mak fó hatene ba Jezús mak Na’i-Feto. Nune’e nia papél mak Tulun-Na’in”.  Maria lori ita ba Jezús, Jezús  mak Maromak Oan, Jezús mak ita adora, Jezús mak halo milagre, liuhusi Maria nia intervensaun.

Durante omilia mós padre joão klarifika prezensa  Santuáriu Maria Auxiliadora ne’ebé husi kedas Amu-Bispu Carlos Belo nia tempu no nu’udar reitór padre Alfonso Nácher (matebian) foti ba Santuáriu Nasionál, ba Kreda tomak. Santuáriu ne’e atu habelar devosaun ba Maria no ba peregrinu sira,  oferese induljénsia plenária, naran katak, halo peregrinasaun ho atitude no kondisaun loos, katak hodi halo konfisaun no Eukaristia. Nune’e, padre provinsiál konvida atu SDB, FMA lori sarani sira, foin-sa’e sira iha fatin ne’e, liuliu durante loron Na’i-Feto  Tulun-Na’in nian, katak loron 24 Maiu.

Hanesan ita hatene ona, tinan ne’e sei halo abertura tinan bisentenáriu Don Bosco nia moris nian iha loron 16 Agostu 2014. Atividade oioin sei hala’o iha tinan ne’e: ordenasaun, enkontru sira, pergrinasaun sira, no iha mós selebrasaun tinan 50 koléjiu Fatumaka nian.

Konvite ba Família Saleziana tomak atu sai ida de’it iha selebrasaun importante ne’e, hodi hanoin  hakle’an fali Don Bosco nia moris, nia pedagojia no ninia espiritualidade.

Komunidade FMA sira ne’ebé partisipa iha festa horisehik iha Fatumaka mak komunidade sira Venilale nian no Baucau. Husi SDB sira marka prezensa komunidade sira husi Venilale, Baucau, Quelicai, no Dili.