Dili-Eusebia 29 Desembru, Irman sira komunidade haksolok hamutuk hodi selebra festa Sagrada Familia nian hamutuk ho sira-nia familia. Festa ne’e hahu ho formasaun ba familia sira ne’ebe hato’o husi Sr. Sebastiana. Formasaun ne’e hahu tuku 10:00 hafoin kontinua kedas ho Selebrasaun Eukaristia ne’ebe preside husi Pe. Mario do Rosario, SDB. Iha homilia padre hato’o ba familia kona-ba familia nia papel iha moris kristaun.

Padre hateten: “Iha natal ita selebra misterio Inkarnasaun nian ne’ebe realiza iha familia ida. Ne’e iha ligasaun ho festa Sagrada familia ne’ebe ita selebra tanba Maromak oan halo-An ba ema hodi mai moris iha familia ida.” Familia ida ne’e importante tanba sira mak fasilita ou fo oportunidade atu Maromak oan atu bele moris. Haree husi figura José no Maria hatudu katak Maria simu Mistrio ne’e ho fiar no Jose iha kapasidade atu bele mehi no mehi ne’e importante tanba bele haree dook buat ne’ebe ita seidauk haree, haree ou prediksi buat ne’ebe sei akontese. Tanba husi mehi José lori Jesus no Maria ba Eziptu hodi salva sira husi herodes nia hanoin aat. Nune’e ohin madre sira konvida familia sira atu selebra festa Sagrada familia nian hamutuk. Ne’e oportunidade ida di’ak atu reza ba malu, reza ba ida-idak nia fidelidade, atu kaben nain sira bele fiel nafatin ba malu nune’e mós ba madre sira-nia fidelidade ba sira nia vokasaun.

Remata misa familia sira halibur hamutuk ho Irman nain 9 hodi halo almoço confraternizasaun nian hafoin komprimenta malu ho kanto no dansa husi familia no mós husi Irman sira. Ikus liu Sr. Sebastiana komprimenta familia sira hodi fo mensajen badak ida ba familia sira no husu atu reza ba malu ba ida-idak nia fidelidade ba vokasaun rasik. Momentu ne’e sai furak liu tanba sente iha klima ksolok familia nian.

(Komunidade Eusebia-Dili)