Dili – Iha loron,  25/12/2019, ami Komunidade tolu iha Komoro: Kom. Eusebia Palomino, Kom. Divina Providénsia no Kom. Saun José hamutuk ho Madre Provinsial, selebra Festa Natál hamutuk iha Gym TOT nian hodi hametin sentidu fraternidade no domin nu’udar bin-alin. Iha momentu ne’e hahu ho reza orasaun Intermedia hamutuk, asiste drama badak Natál nian ho lian Italianu ne’ebé aprezenta husi Irmán Juniores no Novisa sira ne’ebé estuda Lian Italianu ho Me. Maria Letizia. Festa kontinua ho han hamutuk no kumprimenta malu ho kanta no dansa ne’ebé aprezenta husi Komunidade ida-idak. Iha okaziaun ne’e Me. Alma hato’o mensajen Natál nian ba Irmán sira hotu dehan: “Jezus Kosok-Oan mai moris iha ita nia leet, hodi hili hatudu nia An ba dahuluk ba bibi-atan sira, bibi-atan sira mak hirak ne’ebé ema ladún simu iha sosiedade no ema konsidera sira hanesan naok-ten no laiha valor. Nune’e mos iha komunidade ita simu Jezús liuhusi ita Irmán maluk sira hotu maibé liuliu iha sira ne’ebé dalaruma ita la fo importansia”.

Iha tuku 16:00 lokraik, Komunidade 3 iha leten hamutuk ho Komunidade Saun Joaun Bosku-Balide, ba kumprimenta  Arsebispu Don Virgilio iha nia rezidensia Bidau-Lecidere. Molok Arsebispu hato’o mensajen Natál nian mai ami, uluknanai ami aprezenta kantu no dansa husi ida-idak mos ba Amu. Hafoin Arsebispu hato’o nia liafuan. Amu dehan: “ Ha’u haksolok no agradese tebes ho imi nia kantu no prezente sira, liuliu imi nia prezensa atu haburas fali ita nia Karizma no espiritualidade tanba ida-ne’e mak sai momentu ida ne’ebé ha’u bele iha kontaktu nafatin ho Familia Saleziana. Ha’u agradese ba Madre sira nia prezensa iha ne’e, bele hametin liutan ita nia lasu feton ho naan. Ita-nia misaun ne’ebé DB no MM hahu besik tinan atus 2 liubá no kontinua nafatin to’o ohin loron, hanesan ita nia Superior sira dehan wainhira iha joven ita nia misaun nunka para, presiza deit ita nia fleksibilidade, prontidaun no kriatividade. Ha’u fo nafatin ha’u nia parabens no korajen ba Irmán sira, ita reza ba malu nafatin. Boas festas  do Natál no dezeju ksolok tinan foun 2020 nian”.

Atu taka loron boot ida ne’e Komunidade Saun José no Divina Providénsia reza orasaun Vesperas hamutuk, agradese Maromak ba Nia domin ne’ebé haruka Nia Oan mai atu salva Mundu. Obrigada

(Sr. Noemia no Nov. Adelaide)