Mensajen no Bensan Urbi et Orbi Santu Padre nian:

«Povu ne’ebé la’o iha nakukun haree naroman boot ida» (Is 9,1).

 

«Maun no biin-alin sira, ‘feliz Natal’!

 

Iha kalan ne’e, iha inan Kreda nia knotak, moris fila fali Maromk nia Oan-Mane halo an ba mane. Ninia naran Jezús, ne’ebé signifika Maromak salva. Aman, domin rohn-laek no infinitu, haruka Nia mai mundu, la’ós atu kondena mundu maibé atu salva nia (kf. Jo 3, 17). Aman haraik mai ita ho mizerikórdia boot; haraik Nia ba ema hotu; haraik Nia ba nafatin. No Nia moris nu’udar ahi-oan lakan iha nakukun no iha malirin kalan nian.

Kosok-Oan ne’e, moris husi Virjen Maria, mak Maromak nia Laifuan ne’ebé sai isin; Liafuan ne’ebé gia Abraão nia fuan no ain-hakat sira ba rai prometida, no kontinua atrai ema sira ne’ebé konfia iha Maromak nia promesa sira; Liafuan ne’ebé gia judeu sira iha dalan moris-atan nian ba liberdade, no kontinua bolu atan sira tempu hotu nian, inklui sira ohin nian, atu sai husi sira-nia dadur-fatin. Liafuan nabilan liu loron, hola isin iha ema nia oan ki’ik-oan ida, Jezús, roman mundu nian.

Tanba ne’e, profeta haklaken: «Povu ne’ebé la’o iha nakukun sira haree naroman boot ida» (Is 9,1). Loos duni katak iha nakukun iha ema nia fuan sira, maibé Kristu nia roman boot liu; iha nakukun iha relasaun pesoál, familiár, sosiál sira, maibé Kristu nia roman boot liu; iha nakukun iha konflitu ekonómiku, jeopolítiku no ekolójiku sira, maibé Kristu nia roman boot liu.

Atu Jezús Kristu sai roman ba labarik barak ne’ebé terus funu no konflitu isra iha Médio Oriente no iha país oioin mundu nian; sai konfortu ba povu doben Síria nian, ne’ebé seidauk haree ostilidade sira ne’ebé harahun país iha tinan sanulu ne’e remata; doko ema sira ho hakaran di’ak  nia konxiénsia sira; inspira governante sira no komunidade internasionál, atu hetan solusaun sira ne’ebé  garante seguransa no konvivénsia pasífika ba povu sira Rejiaun nian ni hapara sira-nia sofrimentu sira; sai apoiu ba povu Líbia nian, atu bele sai husi krize atuál no deskobre hikas ninia vokasaun atu sai mensajen Liberdade no ko-ezisténsia armonioza nian ba ema hotu.

Atu Na’i Jezús sai roman ba Terra Santa, iha-ne’ebé Nia moris bá, ema nia Makso’ik, no iha-ne’ebé kontinua ema barak nia espetativa, maski kolen maibé la lakon ánimu, hein loron sira dame nian, seguransa no prosperidade; sai konsolasaun ba Iraq, ne’ebé moris tensaun sosiál sira, no ba Iémen, ne’ebé hetan provasaun husi krize umanitária grave.

Atu Kosok-Oan ki’ik-oan Belém nian sai esperansa ba kontinente amerikanu tomak, iha-ne’ebé nasaun oioin atraversa hela períodu ida konvulsaun sosiál no polítika sira; habiit povu Venezuela doben, ne’ebé kleur ona hetan provasaun tan tensaun polítika no sosiál sira, no la kuran tulun ne’ebé presiza; fó bensan ba esforsu sira husi ema sira ne’ebé empeña an atu favorese jusitsa no rekonsiliasaun no serbisu atu supera krize oioin no forma pobreza wain ne’ebé ofende ema ida-idka nia dignidade..

Atu Makso’ik mundu nian sai roman ba Ucránia doben, ne’ebé hakarak solusaun konkreta sira ba dame ne’ebé dura kleur.

Atu Na’i ne’ebé foin moris sai roman ba povu sira Áfrika nian, ne’ebé kontinua hasoru situasaun sosiál no polítika sira ne’ebé, ho modu frekuente obriga ema sira atu emigra, hodi lakon uma no família ida; iha dame ba populasaun ne’ebé moris iha rejiaun orientál sira República Democrática do Congo nian, martirizada  konflitu ne’ebé eziste kleur ona; sai konfortu ba sira ne’ebé terus tanba violénsia sira, kalamidade naturál sira ka emerjénsia sanitária sira; fó konsolasaun ba sira hotu ema persege tanba sira-nia fiar relijioza, ho modu espesiál misionáriu no sarani sira ema lori lakon, no ba sira ne’ebé sai vítima atake nian husi grupu estremista sira, liuliu ih Burkina Faso, Mali, Níger no Nigéria.

Atu Maromak nia Oan-Mane ne’ebé tun husi Lalehan mai rai, sai defeza no mahein ba sira hotu ne’ebé, tanba buat sira-ne’e ka injustisa sira seluk, tenke emigra iha esperansa ba moris ida seguru. Injustisa mak obriga sira hakat liu rai-fuik maran no tasi sira, nakfilak iha semitériu sira; injustisa mak obriga sira suporta abuzu sira ita labele deskreve, moris-atan oioin no tortura sira iha kampu detensaun la umanu; injustisa mak duni isra husi fatin siraiha-ne’ebé sira bele iha esperansa ba moris ida dignu no halo sira hasoru muru sira indiferensa nian.

Atu Emanuel sai roman ba umanidade tomak ne’ebé kanek. Hamamar ita-nia fuan ne’ebé dalabarak sai tos no egoista no halo ita sai instrumentu sira Ninia domin nian. Liuhusi ita-nia oin kiak sira, Nia fó Ninia hamnasa ba labarik sira mundu tomak nian: labarik abandonadu no sira ne’ebé terus violénsia sira. Liuhusi ita-nia liman fraku sira, Nia fó hatais ba kiak sira ne’ebé la iha buat ida atu taka isin, fó paun ba ema hamlaha sira, tau matan ba moras sira. Liuhusi ita nia hakmaluk frajil, Nia besik ba ema idoza/u sira no ema sira ne’ebé moris mesak, migrante no marjinalizadu sira. Iha loron festa nian ida-ne’e, Nia haraik ba ema hotu Ninia ternura no haromak nakukun sira mundu ne’e nian».

(trad.JG)