Venilale – Hahú husi loron Segunda lokraik, 16/12/2019 to’o Domingu, 22/12/2019, Postulante no Novisa sira hala’o sira nia retiru anuál iha Komunidade Maria Auxiliadora-Venilale. Tema ba retiru tinan ida ne’e mak ”Maria nia prezensa iha Don Bosco no Madre Mazzarello nia moris” ne’ebé hato’o husi Pregador sira: Pe. Olivio da Costa SDB no Me. Esmeralda Soares FMA, durante jornada espirituál ne’ebé hala’o iha loron neen nia laran.

Durante retiru nia laran aleinde husi tema ne’ebé ami simu kona-ba Maria nia intervensaun direta iha Don Bosco nia moris liuliu iha ita nia Institutu no ninia knaar ne’ebé importante iha istória Salvasaun nian. Momentu ne’ébé furak no previléjiu ba ami atu haklean liután ami nia domin ba Maromak liuhusi “bolun” ida ne’e hodi tuir Figura Maria tulun nain nian.

Liuliu banati tuir “Maria nia harohan”  kmaus ba Ninia grasa ita sei persevera iha orasaun ho Maria no hanesan Maria atu haberan ita nia komuñaun ho Maromak no atu loke-an ba Kristu ne’ebé hela iha ita nia maun-alin sira no iha realidade lor-loron nian.

Maria, Inan ne’ebé hanorin eskolante sira atu manan tauk sira no persevera iha orasaun atu simu grasa Espiritu nian ne’ebé fó kbiit apostóliku. Espíritu mak fatin lo’os atu halo enkontru ho Maromak tuir  Maria Nia ezemplu tanba  ho Nia ita bele fiél ba orasaun. Wainhira Espíritu Santu hetan klamar ida nakonu ho domin ba Maria, Nia mai lalais  no nia fakar Ninia grasa tomak ba klamar ne’e, tanba Maria Ninia espoza fiél. Se iha Maria, iha mós Espíritu Santu.

Maria nia presenza, liu-liu iha FMA nia momentu orasaun nian, asume signifikadu ezemplu nian ( reza hanesan Maria) no kbiit intersesaun nian (reza ho Maria). Maria, modelu ba ema fiar nain , liuliu ba nia moris orasaun nian. Nu’udar Kristu no Kreda nia Inan, nia orasaun “ho” ita no “mai” ita fó garantia efikas nian ba ita nia orasaun. Konsellu Vatikanu II aferma katak Maria “nia Asunsaun iha lalehan”  la hasai husi nia misaun salvasaun nia kbiit, maibe  ho nia intersesaun barak kontinua atu haraik don salvasaun rohan laek nian. Iha nia karidade materna , Maria tau matan ba nia Oan nia alin sira ne’ebé kontinua halo peregrinasaun iha mundu ne’e iha perigu no preokupasaun nia leet to’o lori sira iha uma lalehan nian. Iha orasaun ho Maria nia tulun, ita mós bele loke ita nia an ba Kristu ne’ebé prezente iha ita nia maun-alin sira no iha realidade lorloron nian.

Hanesan Maria ne’ebé mósu iha Joãozinho nia mehi, Jezús entrega Maria ba nia no husi momentu ne’e kedas nia tau konfiansa tomak iha Maria. Buat hotu sei mósu se Maria nia oan sira kontinua haboot devosaun ba Inan doben ida ne’e.

Tuir Don Bosco nia hanoin ita sei fó valór ba meiu no okaziaun hotu atu habelar devosaun ba Maria Santíssima Auxiliadora.

Husi figura Maria nian ida ne’e tulun ami atu bele hametin liután ami nia domin ba Nia Oan Jezús, no haka’as-an nafatin atu imita tuir nia atitude sira no sai nia oan feto loloos tuir Don Bosco nia hanorin.

(Novisa-Postulante FMA)