Venilale – Iha Domingu III Adventu nian, 15/ 12/ 2019, ne’ebé hanaran Domingu “gaudete” ka ksolok nian, sarani Venilale haksolok tebes duni. Ho ksolok sira simu Arsebispu Don Virgílio do Carmo da Silva SDB no hasa’e misa agradesimentu ba Maromak ba knaar no responsabilidade ne’ebé  Amu Arsebispu simu husi Santa Se iha iha igreja Sagrado Coração de Jesus Venilale. Ida-ne’e inisiativa husi sarani sira, koordena husi Mestre Aleixo rasik, agradese Maromak tan hili nia Venilale nia oan ida sai Bibi-Atan Kreda nian, katak Arsebispu dahuluk Timor nian. Misa prezide husi Arsebispu no konsebrante padre sira komunidade Beatu Filipe Rinaldi nian.

Resepsaun hahú iha lurón tama Venilale ho tara tais husi autoridade lokál iha Venilale no bidu tradisionál tebe-tebe.  Hafoin ho prosisaun, iha-ne’ebé Amu Virgílio sae iha kareta no akompaña hsui sarani sira to’o parókia. Iha misa Amu Arsebispu Virgílio agradese ba sarani Venilale tan bele halibur hamutuk hodi hasa’e Eukaristia . Amu Arsebispu hateten katak: “Eukaristia katak Obrigadu ka Agradese. Nune’e ohin ita mai hamutuk iha ne’e la’ós atu agradese tan pangkat no titúlu maibé tan knar no responsabilidade”.

Iha omilia Amu Arsebispu hateten katak “tempu Adventu mak tempu propísiu no tempu favoravél nian. Tempu atu sarani idak – idak buka Maromak, atu Nia bele orienta ita nia moris. Tempu mós atu sarani idak- idak buka sentidu ba nia an rasik no sentidu ida mai husi de’it Maromak. Ohin Domingu ksolok nian, husu mai ita atu haksolok. Hamutuk iha igreja la’ós atu laran susar maibé haksolok tan Jezús Kristu besik ona atu mai”. Arsebispu husu mos ba sarani Venilale atu laran metin nafatin ba Maromak keta tauk basá Nia nakonu ho laran-sadia.  Aleinde ida ne’e, Arsebispu mós husu ba sarani atu tau matan nafatin ba familia.

Molok  remata Missa, Ir Jacinta Gusmão no Pe. Avelino, reprezenta Venilale oan relijioza/u sira hato’o rekordasaun ida ba Amu Arsebispu.

Amu Virgílio, iha liafuan agradesimentu, esplika katak, knaar arsebispu nian ne’e “la’ós pangkat ida tau tan mai ha’u, maibé responsabilidade boot ida… susar duni, todan duni”. Nia dehan tan katak iha 11 Setembru, bainhira Papa Francisco foti Dili ba arkidioseze nia hakerek: “Ida-ne’e la’ós knaar ida fó ba Virgílio, maibé ida-ne’e priviléjiu ida ne’ebé Uma-Kreda universál hakarak fó ba povu Timor, fó ba Rai Timor, tanba povu Timor, Uma-Kreda Timor mak merese atu simu títulu ida-ne’e, depoizde tinan 78 Dili sai Dioseze”.

Depois de misa  kontinua ho seremonia konfraternizasaun iha seminariu Beatu Filipe Rinaldi Venilale.

(Alice Filipe)