Balide, 13 Dezembru 2019 – Loron furak no kmanek tebes ba estudante kursu Sekretariadu no Computer Balide ne’ebe halo sira nia graduasaun, tamba remata ona kursu durante tinan 1.

Graduadu sira ba tinan ne’e hamutuk na’in 28. Iha Serimonia graduasaun nian, maske Sua Exelensia Secretario Estado da SEPFOPE la marka prezensa, maibe iha Diretora jeral Kursu, Me. Alma Castagna, FMA, reprezentante husi Denafop no INDMO no mos inan aman graduadu sira nian. Serimonia la’o di’ak no nakonu ksolok no fraternidade.

Me. Alma Castagna, FMA, Provinsial Inspetoria TIN, ne’ebe mos nu’udar diretora Jeral Kursu iha ninia mensajen ba graduadu sira nia haktuir kona ba Don Bosco ne’ebe aprende servisu oin-oin iha nia moris, nune’e bele hanorin no tulun foin-sa’e sira atu hetan servisu ne’ebe dignu. Tan ne’e FMA sira mos hanesan DB, pronto atu tulun foin-sa’e sira atu sai sarani di’ak no sidadaun laran mos. Tanba servisu fo dignidade ba ema no tempu hanesan halo ema partesipa iha Maromak nia hahalok. Mensajen sira ne’e nudar bukae ba graduadu sira atu hatene uza kompeténsia ne’ebe sira iha hodi harii futuru ida di’ak no dignu no tempu hanesan kontribui ba nasaun Timor Leste nia dezenvolvimentu.

Nu’udar preparasaun ba loron graduasaun nian, iha mos retiru, konfisaun no misa agradese nian, ne’ebe prezide husi Pe. Acacio de Castro ba graduadu no inan aman sira. Serimonia simples ne’e la’o ho di’ak tan ema hotu nia kolaborasaun.

Nune’e, uluk knanain agradese ba Maromak ne’ebe akompaña ona ami durante prosesu aprendizajen to’o ohin loron. Agradese ba governu ne’ebe mos suporta ami finansiamentu, liu husi SEPFOPE, ba diretora jeral, Me. Alma no mos Madre Salesiana ida-idak iha komunidade Balide, ba treinador/a sira, agradese ba inan aman ne’ebe prontu atu suporta no tulun.

Parabens No Obrigada Wa’in …

 

Komunidade Balide