Dili – Ohin, 10 Dezembro 2019, Estudante Estajiarios husi UNTL organiza serimonia despedida nian ho eskola Maria Auxiliadora – Comoro, tanba durante fulan 6 nia laran sira hala’o ona estajiu iha eskola ne’e, hodi halo esperensia hanorin ho aluno sira iha 2 siklu no 3 siklu.  Estajiariu sira hamutuk nain ualu (8) mak mai halo estajiu iha ne’e, hahú husi fulan Jullu to’o remata no ohin mak momentu di’ak atu agradese ba malu.

Iha serimonia despedida ida ne’e, Hahú oras 10:00 to’o remata no organiza rasik husi estajiariu sira, no partisipasaun  husi reprezenta dosente UNTL nain rua, professores, Irman no trabalhadores.

Durante serimonia, iha mos lia menon husi parte eskola, reprezentante dosente no husi Estajiariu sira. Husu eskola deretora eskola Ir. Paulina Correia, FMA hato’o nia mensajen ba estajiariu sira hodi foti liafuan tolu husi amu Papa Francisco ne’ebé dehan: “Lisensa, Obrigadu no Deskulpa.” Nune’e diretora eskola  hato’o ba sira katak husi eskola nia parte hakarak agradese ba  sira nia disponibilidade, haraik – an no kolaborasaun ne’ebé tulun ne’ebé sai mós forsa ba profesores sira iha prosesu aprendizajen nian. husu mos deskulpa ba hahalok ruma husi alunos no professores sira ne’ebé  la tulun atu halo esperiensia di’ak maibé koko atu foti esperiensia sira ne’e nu’udar bukae ida atu hasoru esperiensia foun ne’ebé sei mai. Parabens tanba sira bele adapta no hasoru situasaun sira ho hakmatek.

Estudante estajiariu sira mos agradese ba eskola hodi afirma fali Diretora Eskola nian lian menon ne’ebé foti husi  Amu Papa Francisco nia liafuan. Sira dehan Lisensa tanba eskola fo ona lisensa mai ami hodi halao ami nia estajiu. Agradese tanba ami hetan esperiensia foun no agradese ba buat di’ak hotu ne’ebé simu husi eskola no Deskulpa tanba dala ruma ami nia hahalok ruma ne’ebé la fó satisfas ba profesores sira.

Serimonia despedida ne’e hala’o simples maibé nakonu ho sentidu gratidaun nian. Nu’udar eskola agradese ba estajiariu sira nia prezensa durante fulan neen nia laran, hodi fó rekordasaun simples ruma ba sira. Husi estajiadu nia parte mós agradese ba eskola liu-liu ba  profesores koperante sira ne’ebé durante ne’e akompanha sira iha esperensia hanorin nian, nune’e  sira husik hela kuadru S. João Paulo II nu’udar Rekordasaun ida ba eskola.

 

Husi: Marcita Marques (Sekretária Eskola Maria Auxiliadora)