Editoriál: Ho Maria ita sai ba li’ur

Iha fulan dedika ba Maria, nu’udar oan sira, naturál tebes ba ita atu ba fali ita-nia inan hodi rona ninia liafuan di’ak sira, hodi kontempla ninia moris, moris saran An tomak atu hala’o Maromak nia planu no kolabora ho nia Oan ba ema sira-nia salvasaun. Maria, sai modelu ita-nia moris “dixípula-misionária” nian.
Hanesan Papa Francisco hakerek, Maria mak “misionária ne’ebé hakbesik ita, atu akompaña ita iha ita-nia moris tomak, hodi loke fuan sira ba fiar ho ninia domin inan nian.Nu’udar inan loloos, nia la’o ho ita, luta ho ita no halo ita hakbesik nafatin ba Maromak nia domin”. (EG 286) .

Ho Maria ita sai ba li’ur, vizita família sira hodi oferese ba sira ksolok, laran-di’ak, oferese “Liafoun Di’ak”, iha atitude haraik an no respeitu, tanba ema ida-idak, maski nia kiak no ki’ik liu, ema sira ne’e hotu Maromak nia oan doben sira.
Ita husu Maria hanorin ita sai kontemplativa “mistériu Maromak nian iha mundu, iha istória no iha moris loroloron nian no ema ida-idak no ema hotu nian. Nia mak feto harohan-na’in no serbisu-na’in iha Nazaré, maibé mós Na’i-Feto prontidaun nian, ne’ebé sai «lalais» (Lc 1, 39) husi ninia povoasaun atu tulun ema seluk” (EG 288).