Mensajen reforma Santa Teresa d’Ávila nian

 

“Finalidade ikus Reforma tereziana no kriasaun monastériu foun sira-nian, iha mundu ida kiak iha valór espirituál  mak haburas liuhusi orasaun asaun apstólika”. Amu-Papa fó hanoin ida-ne’e iha loron ne’ebé Kreda selebra festa Maria Virjen foho Carmelo nian, iha mensajen ba Bispu Jesús Garcia Burillo, Ávila nian, iha okaziaun tinan 450 aniversáriu fundasaun monastériu San José-Ávila no inísiu reforma Carmelo nian hodi Santa Teresa de Jezús nia obra sira. “Carmelo nia reforma – Bento XVI hakerek – ne’ebé nia aniversáriu hakonu ho ksolok interiór, moris husi orasaun no dirije ba orasaun. Hodi promove retornu radikál ba Regra primitiva, hodi hadook an husi Regra mamar, Santa Teresa de Jezús intende promove forma ida moris nian ne’ebé favorese enkontru pesoál ho Na’i, basá nesesáriu “tama iha solidaun no hateke iha ida-idak nia íntimu, no keta hadook an husi Bainaka Di’ak tebes ida-ne’e”.

“Santa Teresa propoin estilu foun vida karmelitana nian iha mundu foun. Tempu sira ne’ebá mak “tempu susar nian”. No iha tempu ne’ebé, hanesan Mestra Espiritualidade ne’e dehan […]  “Ahi sunu mundu, sira hakarak kondena filafali Kristu, sira hakarak hamonu ninia Kreda ba rai. Lae, ha’u-nia irmán sira, la’ós tempu atu trata ho Maromak argumentu lahó importánsia”.  “La’ós familiár ba ita, iha situasaun ne’ebé ita moris daudaun, reflesaun ida naroman tebes no interpela ita, ne’ebé halo sékulu haat liubá husi Santa místika ne’e?”. “Finalidade ikus Reforma tereziana nian no kriasaun monastériu foun sira, iha mundu ida kiak ho valór espirituál, mak haburas liuhusi orasaun asaun apostólika sira; propoin modu ida vida evanjélika ne’ebé sai modelu ba sira ne’ebé buka vida ida perfeisaun nian, ho konvikasaun katak reforma auténtika pesoál  no ekleziál halo ita naksira kadavés di’ak liután iha ita-nia an rasik Kristu nia ‘forma’. […] Ohin-loron mós, hanesan iha sékulu XVI, no iha tranformasaun lais nia leet, orasaun mak loos duni motór apostoladu nian, atu bele halian filafali ho klareza no dinamizmu boot mensajen salvasaun Jezús Kristu nian. Urjente tebes atu Liafuan moris nian bele fekit iha klamar sira ho forma armonioza, ho nota sonora no atraente”.

“Iha misaun difisil ida-ne’e, Teresa d’Ávila nia ezemplu maka tulun boot ida. Ita bele afirma katak, iha ninia tempu, Santa ne’e evanjeliza lahó laran-morna, ho entuziazmu boot, ho métodu sira dook husi babaruk, ho espresaun sira nakonu ho roman. Buat sira ne’e hotu konserva ninia freskura iha mundu atuál, ne’ebé sente urjénsia atu batizadu sira renova sira-nia fuan liuhusi orasaun pesoál ne’ebé tuir místika Ávila nian tau iha sentru Kristu nia Umanidade Santu liu, nu’udar dalan mesak atu hasoru Maromak nia glória”. “Kristu nia kbiit lori Santa Ávila nian atu hakbarak inisiativa sira nune’e Maromak nia povu bele deskobre filafali ninia kbiit iha forma mesak posivel: fó espasu iha fuan laran ba Na’i Jezús nia sentimentu sira, hodi buka iha sirkunstánsia hotu atu moris ho modu radikál ninia Evanjellu. Ne’e signifika liuliu, permete Espíritu Santu halo ita sai Mestre nia belun sira no konfigura ita iha Nia. Signifika mós kapta ninia mandatu hotu no hakohak ninia kritériu sira ho haraik-an, hodi hakribi superfluu (buat naresin), la halo aat ba ema seluk no bá oin ho simplisidade no fuan maus. Halo nune’e ema sira hale’u ita, sei haree ksolok ne’ebé mai husi ita-nia adezaun ba Na’i, hodi la tau obstákulu ida ba ninia domin, hodi sai dispostu/a nafatin atu fó razaun ba ita-nia esperansa”.