Mensajen husi Provinsiál

Irmán doben sira,

 

Ita moris daudaun ksolok paskál, ksolok hein Espíritu nian. Espíritu mak moris, ksolok, konsolasaun. Nia mak sentru ita-nia vida interiór nian! Lahó vida interiór, ne’ebé Espíritu anima, ita-nia vokasaun esterioridade de’it. Espíritu halo ita iha kbiit ba domin loos. Konvite ba ita atu simu Espíritu iha ita-nia moris no atu tulun foin-sa’e sira tau matan ba sira-nia interioridade nune’e sai ema haksolok no forte iha sira-nia sasin moris nian. Ita husu Na’i prezente ksolok nian, Espíritu ninia frutu ida.

Konvite boot ida mai husi Madre Jerál no husi surat “Rallegratevi” (Haksolok bá) ne’ebé dirije ba ema konsagradu/a sira ba tinan 2015 dedika ba vida konsagrada.  Madre Jerál fó hanoin katak “ksolok” mak parte esensiál ita-nia identidade karizmátika nian no konvida ita atu sai ho foin-sa’e sira “sasin ksolok” nian, atu tranzmite ba ema hotu ksolok  Evanjellu nian ne’ebé ita labele tahan netik ba ita mesak.  Ksolok hanesan Madre Mazzarello dehan mak rezultdadu husi “fuan ida ne’ebé hadomi maka’as Na’i”.

Ita iha ona fulan Maiu nia laran, fulan Maria Ausiliadora nian. “Ksolok tau ita iha komunikasaun ho Maria ne’ebé iha momentu Anunsiasaun nian, sente nia fuan fekit ho liafuan ida riku ho Mistériu. Liafuan ksolok  husi Maromak nia parte iha Anunsiasaun sai kedas agradesimentu ba buat kmanek hotu Na’i halo iha nia no Maria hasae lia iha ksolok Magnificat nian!” (Sir.945).  Ha’u konvida imi atu kontempla  Mistériu boot Maromak nia hilin ba Virjen Maria atu sai Jezús nia Inan, hodi harohan ho liafuan saran an Papa Francisco nian:

“”Maria, rai didi’ak ami-nia moris iha ita-nia liman; fó bensan no habiit hakaran hotu di’ak nian; halakan no haburas fiar; tahan no leno esperansa; hamoris no anima karidade; gia ami hotu iha dalan santidade nian; hanorin ami ita-nia  domin rasik predilesaun nian ba ki’ik no kiak sira, ba sira ema  tau iha ninin no ema terus-na’in sira, ba sala-na’in sira no sira ne’ebé neon-kraik: halibur ami hotu iha ita-nia protesaun nia okos no entrega ami ba ia-nia Oan doben, Jezús ami Na’i”.

Liafuan ida tan “ksolok: no “obrigada” nian ba Na’i ba eventu furak sira Kreda no Institutu nian iha tempu grasa nian ida-ne’e. Iha motivu  barak atu dehan obrigada ba Maromak maibé entre motivu sira-ne’e ha’u subliña buat tolu:

Ita agradese Na’i tan haraik mai ita Amu-Papa santu foun na’in rua: João XXIII, Papa di’ak  no João Paulo II, Papa misionáriu no Papa  protetór família nian, hanesan Papa Francisco deklara iha loron 27 Abríl 2014, loron kanonizasaun nian.

Ita agradese Espíritu tan haraik mai ita susesór da-10 Don Bosco nian, padre Ángel  Fernández Artime.

Ita agrese Jezús ba don moris ita-nia Madre jerál nian nu’udar sentru unidade no komuñaun Institutu nian!

Ha’u halo votus atu imi moris fulan Maria Tulun-Na’in nian ida iha fekundidade no ksolok no novena santa Pentekostes nian.

Ho domin no gratidaun,

Ir Paola Battagliola