Maun no bin-alin sira, bondia!

Evanjelista João aprezenta mai ita, iha domingu IV tempu paskál nian, ilas Jezús Bibi-Atan Di’ak. Hodi kontempla pájina Evanjellu nian ida-ne’e, ita bele komprende tipu relasaun ne’ebé Jezús iha ho Ninia dixípulu sira: relasaun ida bazeia ba ternura, domin, resiprosidade koñesimentu nian no promesa don ida sukat-laek: «Ha’u mai – Jezús dehan – atu sira iha moris no moris naresin» (Jo 10,10). Relasaun ne’e mak modelu relasaun sarani no relasaun umana sira.

Ema barak ohin mós, hanesan iha Jezús nia rempu, aprezenta sira-nia an nu’udar “bibi-atan” ira-nia ezisténsia nian; maibé Na’i Moris-Hi’as de’it mak Bibi-Atan loos, ne’ebé haraik moris naresin mai ita. Ha’u konvida imi atu iha konfiansa iha Na’i ne’ebé gia ita. Maibé Nia la gia de’it ita: Nia akompaña ita, la’o ho ita. Ita rona ho neon no fuan nakloke ba Ninia Liafuan, atu haburas ita-nia fiar, leno ita-nia konxiénsia no tuir Evanjellu nia hanorin.

Iha domingu ne’e ita harohan ba Bibi-Atan sira Kreda nian, ba Bispu hotu, inklui Bispu Roma nian, ba amlulik hotu, ba hotu! Ho modu partikulár ita harohan ba amlulik foun Dioseze Roma nian, ne’ebé ha’u foin ordena, iha Bazílika S. Pedro. Saudasaun ida ba amlulik foun na’in 13! Na’i tulun ita bibi-atan sira atu sai fiél nafatin ba Mestre no sai gia matenek no ho naroman ba Maromak nia povu entrega ba ita. Ba imi mós, halo favór, ha’u husu atu tulun ami: tulun ami atu sai bibi-atan di’ak. Dala ida ha’u lee buat furak liu ida oinsá Maromak nia povu  tulu bispu no amlulik sira atu sai bibi-atan di’ak. S. Cesari Arles mak hakerek, padre ida sékulu dahuluk sira Kreda nian. Nia esplika oinsá Maromak nia povu tenke tulun bibi-atan, no halo ida-ne’e ho ezemplu ida: Bainhira karau-vaka nia oan hamlaha nia bá karau-vaka inan, atu foti susu-been. Karau-vaka inan, la fó kedas: parese nia rai ba nia an. No sá mak karau-vaka oan halo? Ho ni ainus dere karau-inan nia susun sira, atu susu-been sai. Ne’e ilas furak! “Nune’e imi – santu ne’e hateten – tenke sai ho bibi-atan sira: imi dere nafatin sira-nia odamatan, sira-nia fuan, atu sira haraik susu-been doutrina nian ba imi, susu-been grasa nian no susu-been matadalan nian”. No ha’u husu imi, halo favór, xateia bibi-atan sira, disturba bibi-atan sira, ami bibi-atan hotu, atu ami bele fó ba imi susu-been grasa nian, doutrina nian no matadalan nian. Xateia! Imi hanoin ba ilas furak karau-vaka oan nian, oinsá xateia ni ainan atu fó han ba nia.

Hodi banati tuir Jezús, bibi-atan ida-idak «dalaruma sei hela iha oin atu hatudu dalan no tahan povu nia esperansa – bibi-atan dalaruma tenke iha oin – dala seluk nia hela simplesmente iha hotu-hotu nia klaran ho ninia prosimidade simples no misterioza, no iha sirkunstánsia ruma nia tenke la’o iha povu nia kotuk, atu tulun sira ne’ebé hela iha kotuk» (Esort. ap. Evangelii gaudium, 31). Atu bibi-atan hotu sai nune’e! Maibé imi xateia bibi-atan sira bá atu sira fó matadalan doutrina no grasa nian.

Iha domingu ne’e ita selebra Loron mundiál orasaun nian ba vokasaun sira. Iha Mensajen ba tinan ne’e ha’u fó hanoin katak «vokasaun ida-idak rekere iha kazu hotu ézodu ida husi an rasik atu sentra ezisténsia rasik iha Kristu no Ninia Evanjellu» (n. 2). Tanba ne’e bolun atu tuir Jezús mak tempu hanesan fó entuziazmu no husu empeñu. Atu bele realiza, presiza tama iha amizade kle’an ho Na’i atu bele moris husi Nia no ba Nia.

Ita harohan atu iha tempu ne’e mós, foin-sa’e wain rona Na’i nia lian, ne’ebé nafatin iha risku atu lian seluk hanehan tiha lian ne’e. Ita harohan ba foin-sa’e sira: karik iha Prasa ne’e, iha ema ruma ne’ebé rona Na’i nia lian ne’ebé bolu nia ba saserdósiu; ita harohan ba nia, se nia iha ne’e, no ba foin-sa’e hotu ne’ebé simu bolun.