Baucau – Komunidade FMA S. Teresa d’Avila, Baucau selebra iha loron 9 Maiu, loron moris Madre Mazzarello nian, solenidade ba Santa konfundadora ho Don Bosco Institutu “Filhas de Maria Auxiliadora” (FMA) nian. Loloos S. Maria Mazzarello nia festa monu iha loron 13 Maiu, maibé tanba iha Baucau iha festa no prosisaun Na’i-Feto Fátima, nune’e Maria Mornese nian fó fatin ba nia Inan, Maria Nazaré nian. Selebrasaun ne’e hahú ho preparasaun tríduu, ne’ebé lori irmán sira atu lee Madre Mazzarello nia surat ruma ne’ebé ko’alia kona-ba “Jezús nia prezensa iha komunidade nia moris, iha komunidade nia orasaun no misaun”, prepara husi Ámbitu Família Saleziana FMA nian.

Komunidade selebra festa ne’e hamutuk ho família sira ne’ebé iha bairru, animadór/a no grupu Maria Mazzarello, ho padre David SDB nu’udar selebrante no padre Justiniano SDB nu’udar konselebrante. Selebrasaun ne’e simples maibé nakonu ho familiaridade boot no ksolok. Hodi hanoin fali Madre Mazzarello nia  moris, mai konvite ida uluknana’i ba família no edukadora sira katak hanesan Maromak entrega foin-sa’e sira, “A te le affido”, ba Madre Mazzarello, nune’e ohin loron mós Maromak entrega sira mai ita. Ida-ne’e mak konvite ne’ebé Padre David SDB fó ba adultu sira. Nia mós haktuir katak “Madre Mazzarello mai husi família simples ida maibé nakonu ho fiar no domin, serbisu no orasaun. Família eduka Madre Mazzarello no alin sira ba moris morál aas no ba moris espirituál kle’an no maka’as. Eukaristia mak sentru ba ninia moris tomak, iha ninia atividade hotu”.

Maria Mazzarello nia moris bele dehan katak husi “konversaun (moras tifu) nia hakat ba kontemplasaun, husi moris to’os-na’in nian ba moris edukadora nian”, nune’e bele dehan katak “família nia edukasaun sai forte no di’ak se prepara oan sira ba futuru ne’ebé di’ak no nakonu ho esperansa”, padre David salienta.

Selebrasaun remata ho merenda hamutuk hafoin fahe malu atu ba akompaña Na’i-Feto ne’ebé vizita família sira.