Irmán, leigu no foin-sa’e
doben sira,

Ita foin hotu esperiénsia Kapítulu Inspetoriál nian ne’ebé envolve Irmán sira husi komunidade hotu no foin-sa’e, leigu no padre salezianu balun, ne’ebé hamutuk reflete kona-ba ita-nia realidade no koko atu buka dalan ruma atu hatán ba ezijénsia mundu nian, tuir ita-nia karizma no bolun sira ne’ebé Kreda eh liuliu Amu-Papa Francisco hato’o ba ita hotu. Iha loron lima ne’e ami halo esperiénsia ki’ik oan kona-ba sinodalidade: oinsá reflete hamutuk, rona ida-idak nia reflesaun no proposta, apresia kontribuisaun ne’ebé ida-idak fó bazeia ba ninia vokasaun no esperiénsia ho labarik no foin-sa’e sira. Tebes, ha’u sente atu agradese sira hotu ne’ebé partisipa, liuliu foin-sa’e sira ne’ebé fiél husi loron dahuluk to’o remata no sira husu mai ita, hodi agradese ba buat ne’ebé ita halo ona, atu loke nafatin ita-nia fuan no ita-nia uma sira ba foin-sa’e sira, atu fó fatin ba sira. Apelu ida ne’e sadik komunidade ida-idak atu interpela membru sira, relijiozu no leigu, saida mak bele halo atu ita-nia komunidade sira sai fatin família nian, iha ne’ebé ema hotu bele sente “iha uma”. Dala ruma ita hanoin ba estrutura “partikulár” atu rona foin-sa’e sira, maibé ita la hatene fó tempu ba sira ne’ebé hakbesik ita ka ita la haree bainhira sira presiza ita-nia konsellu ka proximidade. Hanesan Amu-Papa hakerek “Foin-sa’e sira hotu ne’ebé terus senti ba komunidade sarani ne’ebé besik sira ne’ebé bele reflete liafuan hirak ne’e ho nia hahalok, komunidade nia hako’ak no tulun ne’ebé konkretu!” (CV, 77)

Durante Kapítulu, ami hotu, hamutuk, koko atu komprende saida mak Maromak husu ba ita-nia Institutu, ba ita-nia Família Saleziana, nune’e ita hotu bele hatán ba Maria nia konvite “Imi halo buat hotu ne’ebé Nia sei dehan”. Sr. Maria Luisa Miranda nia vizita mós fó aten berani mai ita atu servisu hamutuk nu’udar Família Saleziana, hodi hatene, ulukknanai ida-idak nia espesifisidade no hodi hariku an beibeik ho forma-saun ida ne’ebé kle’an no karizmátika. Ita-nia Família hari’i iha Don Bosco nu’udar fatuk inan, nune’e ita la bele fiél ba ita-nia Fundadór se ita la hatene ninia hanoin kona-ba asosiasaun sira ne’e, liuliu grupu sira ne’ebé nia rasik hahú. Tan ne’e, ha’u hakarak konvida imi hotu, la’ós de’it sira ne’ebé animadór ka delegadu/a, atu hakle’an liután ita-nia espiritualidade nune’e ita bele akompaña foin-sa’e no leigu sira atu ha-la’o sira-nia vokasaun nu’udar prezente ba Kreda.

Iha fulan dezembru ita sei halo Programasaun ba tinan 2020: tinan barak ona ita hala’o eventu ida ne’e hamutuk ho foin-sa’e no leigu sira, nune’e ita hakarak kontinua hodi fó kualidade boot liután ba ita-nia sorumutu.
Amu-Papa Francisco hakerek katak: “Sabedoria Áfrika nian dehan katak: ‘atu eduka labarik ida presiza knua tomak ida’. Maibé ita tenke hari’i knua ida ne’e, nu’udar kondisaun ida atu eduka”. Don Bosco no madre Mazzarello nia hahalok hatudu katak sira servisu duni hodi envolve ema hotu hanesan “knua tomak ida”: ita servisu tuir ita-nia karizma no ita sei sai fiel mós ba Kreda nia proposta sira.
Obrigada barak ba imi hotu nia prezensa ba foin-sa’e no labarik sira nia di’ak.

Irmán Alma Castagna