Katekeze ho Papa Francisco – 7 Maiu 2014

RV – Hodi fó sekuénsia ba katekeze kona-ba don Espíritu Santu nian, Papa Francisco ko’alia kona-ba don konsellu nian iha katekeze kuarta, 7 Maiu nian. Nia destaka katak don ne’e habiit ema atu halo hilin loos, loron ba loron, tuir lójika Jezús no Ninia Evanjellu nian.

Asesu Katekeze ho lia-portugés

Besik peregrinu 60.000 horik iha prasa S. Pedro ba audiénsia jerál ho Amu-Papa, ne’ebé haktuir improtánsia don ne’e nian ba komuñaun entre Maromak no ema. “Konsellu mak don ne’ebé ho nia Espíritu Santu halo ita-nia konxiénsia iha kbiit atu halo hilin konkretu komuñaun nian ho Maromak. Nia halo ita sai sensivel ba ninia lian no orienta ita-nia hanoin sira, hodi halo ita buras interiormente, atu keta husik egoízmu no ita-nia modu rasik atu haree sasán sira mak book ita”.

Atu buat ne’e akontese, Francisco dehan esensiál liu mak orasaun, basá nia halo atu ema sai dosil ba Maromak nia lian. Halo nune’e, nia husik ba sorin ninia lójika pesoál, nakonu ho limitasanu sira, atu sai tasak iha sintonia kle’an ho Espíritu.

“Ita fila nafatin ba pontu hanesan. Orasaun. Harohan importante liu!”, Papa Francisco hateten, hodi afirma katak presiza harohan la’ós de’it orasaun sira ne’ebé aprende bainhira labarik, maibé mós uza liafuan, hodi husu tulun no konsellu.

Hanesan don seluk Espíritu nian, konsellu mós sai rikusoin ba komunidade sarani tomak. Ida-ne’e tanba ita bele rona Maromak nia lian liuhusi maun-alin sira, Amu-Papa dehan. “Don boot ida ita bele sura ho mane no feto sira ne’ebé tulun ita rekoñese Maromak nia hakaran iha ita-nia moris!”.

Francisco fó ezemplu oinsá don ne’e funsiona iha prátika, hodi temi esperiénsia ne’ebé nia iha iha konfesionáriu iha Santuáriu Lujan nian, iha Argentina. Iha okaziaun ne’e, iha fila laran, iha foin-sa’e mane ida ne’ebé konfesa problema boot ida. Nia hateten katak nia iha ne’ebá tanba, nia inan fó konsellu ba nia atu husu Na’-Feto nia tulun.

“Haree bá ne’e feto ida ne’ebé iha don konsellu nian! Nia la hatene buka saida ba nia oan-mane nia problema, maibé hatudu dalan loos: ‘Bá Na’i-Feto no nia sei dehan sá mak tenke halo’. Ne’e mak don konsellu nian. Keta dehan: ‘Maibé, buat ne’e…’. Husik Espíritu Santu ko’alia”.

Amu-Papa destaka katak feto simples ne’e fó ba nia oan konsellu loos, basá, hodi hateke ba Na’i-Feto, foin-sa’e mane ne’e komprende sadia mak nia tenke halo. “Ne’e mak don konsellu nian. Imi, inan sira, ne’ebé soi don ne’e, imi husu ba imi-nia oan sira: fó konsellu ba oan sira mak don ida Maromak nian.”