Dili – Iha loron 16 Novembro, aluno sira husi Pre-Eskolar Maria Auxiliadora Comoro Ano Lectivo 2019, hala’o sira nia festa Graduasaun katak sira remata ona sira nia aprendizajen iha etapa Pre-Escolar hodi kontinua fali iha etapa foun iha eskola Primaria. Festa ne’e partesipa husi Diretor Edukasaun ba Pre-Eskolar, senhor Miguel Dos Santos, Professores, Madre sira, Aman-Inan graduadu sira nian no mós partesipa husi Pre-Eskolar Turma A ne’ebe mai haksolok hamutuk ho sira-nia aprezentasaun furak sira.

Serimónia Graduasaun hahu ho prosisaun tama husi Graduadu sira ba fatin hafoin sira kanta Hino Nasional “Patria, Patria”. Depoizde sira hananu Hino Nasional, Graduada ida dirije kedas orasaun hodi agradese ba Maromak ba grasa hotu ne’ebe sira simu loron-loron. Tuir mai mak diskursu husi Diretora komunidade B. Eusebia Palomino, Me. Sebastiana da Costa, FMA no mós Diskursu husi reprezentante Edukasaun senhor Miguel Dos Santos.

Iha diskursu sira, senhor Miguel agradese ba Eskola tanba kolabora hamutuk ho edukasaun liu husi sira-nia dedikasaun hodi eduka labarik sira. Diretor edukasaun ba Pre-Eskolar ida ne’e afirma tan katak: “Eskola Eskola Maria Auxiliadora sai parseira di’ak ba edukasaun tanba tinan-tinan kontribui hodi eduka labarik sira ho di’ak tuir sistema Saleziano nian katak eduka ho fuan nue’e ema barak hakarak husik nia oan mai eskola iha ne’e maibe labele simu hotu tanba kondisaun fatin la to’o atu simu labarik barak. Nune’e mos senhor Miguel agradese ba Profesores sira nia dedikasaun maske sira balun seidauk sai funsionario publiku, maibe sira haka’as-an atu kontribui ho sira nia kapasidade tomak hodi labarik sira”. Husi parte komunidade nian Me. Sebastiana iha nia Diskursu, hato’o mós agradesementu ba Edukasaun nia prezensa iha eskola hodi haree rasik realidade eskola nian no mós agradese ba konfiansa husi Aman-inan hodi mai eskola iha fatin ne’e. Madre hatutan tan katak: “Iha Eskola, profesora sira haka’as-an atu eduka sira hotu ho pasiensia maske sira balun mai nakar, hahu eskola sira  tanis beibeik maibe ikus mai bele aprende buat ruma ba sira nia futuru”. Husi diskursu sira ne’e hatudu apresiasaun ba malu liu-liu ba ema ida-idak nia haka’as-an hodi kontribui iha edukasaun.

Remata diskursu, Graduadu sira simu sira-nia Diploma ne’ebe entrega rasik husi Diretor Edukasaun no Diretora Eskola Me. Paulina Correia, FMA. Entrega tiha Diploma, Graduadu sira hato’o liafuan agradese nian ba ema hotu ne’ebe tulun no akompana sira durante iha sira nia prosesu aprendizajen. Diretora eskola mós hato’o nia Parabens ba Graduadu sira hotu ne’ebe maske nakar maibe sira iha hakarak boot atu aprende. Nune’e Me. Paulina fo rekordasaun oan ruma ba sira, iha sira-nia loron especial ne’e. Ikus liu taka ho Serimónia Co-Fraternizasaun no konviviu nian ne’ebe aprezenta rasik husi Graduadu sira no mos husi Pre-Eskolar Turma A ne’ebe halo ema hotu haksolok ho sira-nia aprezentasaun.

Serimónia Graduasaun hala’o ho susesu tanba manorin sira-nia haka’as-an hodi prepara di’ak aluno sira no mós hetan kolaborasaun maksimu husi Aman-Inan sira ne’ebe ho laran luak kontribui hodi prepara ba festa to’o remata.