Papa Francisco iha Regina Coeli – 4 Maiu 2014

Maun no bin-alin sira bondia!

Evanjellu domingu ne’e nian, domingu datoluk Páskua nian, mai ida dixípulu Emaus nian (kf. Lc 24,13-35). Sira na’in rua mak Jezús nia dixípulu, ne’ebé depoizde Ninia mate no liutiha sábadu, husik Jerusalém no filafali, triste no neon-kraik, ba sira-nia aldeia, hanaran Emaus. Tuir dalan Jezús moris hi’as la’o iha sira-nia sorin, maibé sira la rekoñese Nia. Haree sira triste nune’e, Nia uluknanai tulun sira komprende katak Mesias nia paixaun no mate hola parte Maromak nia planu no haktuir tiha ona molok iha Eskritura Sagrada sira; nune’e Nia halakan fali ahi esperansa nian iha sira-nia fuan.

Iha pontu ne’e, dixípulu na’in rua haree atrasaun estraordinária ba ema misteriozu ne’e, no sira konvida Nia atu hela ho sira kalan ne’e. Jezús asieta no tama iha sira-nia uma. No bainhira, iha meza, nia haraik bensan ba paun no silu, sira rekoñese Nia, maibé Nia lakon husi sira-nia matan, hodi husik sira nakonu ho maravilla. Simu tiha naroman husi Liafuan, sira rekoñese tiha Jezús moris-hi’as iha silu paun, sinál foun Ninia prezensa nian. No sira sente kedas nesesidade atu fila hikas ba Jerusalém, atu refere ba dixípulu sira seluk sira-nia esperiénsia ne’e, katak sira hasoru Jezús moris no sira rekoñese Nia iha jestu silu paun nian.

Dalan Emaus nian sai símbolu ita-nia dalan fiar nian: Eskritura no Eukaristia mak elementu indispensavel ba enkontru ho Na’i. Ita mós dalabarak to’o iha Misa domingu nian ho ita-nia preokupasaun  sira, ita-naai difikuldade no deziluzaun sira… dalaruma moris hakanek ita no ita la’o ho triste, bá ita-nia “Emaus”, hodi fila kotuk ba Maromak nia planu. Ita hadook an husi Maromak. Maibé Liturjia Liafuan nian simu ita: Jezús esplika Eskritura sira no halakan hikas iha ita-nia fuan ahi fiar no esperansa nian, no iha Komuñaun haraik kbiit mai ita. Maromak nia Liafuan, Eukaristia. Lee loroloron pasajen ida Evanjellu nian, no iha domingu bá halo Komuñau, simu Jezús. Nune’e mak akontese ho dixípulu Emaus nian: sira simu Liafuan; sira fahe paun no husi sentimentu triste no lakon nian, sira sai ema haksolok. Imi hanoin didi’ak bá. Maun no bin-alin sira, Maromak nia Liafuan no Eukaristia nafatin hakonu ita ho ksolok. Imi hanoin didi’ak bá! Bainhira ó triste, foti Maromak nia Liafuan. Bainhira ó sente neon-nakraik, foti Maromak nia Liafuan no bá Misa domingu nian atu halo Komuñaun. Atu partisipa iha mistéiru Jezús nian. Maromak nia Liafuan, Eukaristia: hakonu ita ho ksolok.

Hodi Maria Santíssima nia intersesaun, ita harohan, atu sarani ida-idak, hodi moris esperiénsia dixípulu sira Emaus nian, espesialmente iha Misa domingu nian, bele deskobre hikas grasa enkontru ho Nai ne’ebé nakfilak moris, ho Na’i moris-hi’as, ne’ebé nafatin ho ita. Iha nafatin Maromak nia Liafuan ida ne’ebé haraik orientasaun mai ita depoizde ita-nia halai lakon; no  liuhusi ita-nia kolen no deziluzaun sira iha nafatin Paun ida silu fahe ne’ebé halo ita la’o bá oin iha dalan.