Dili – Iha loron 11 Novembro, molok hala’o ezame final, alunu no profesora sira husi eskola Maria Auxiliadora Comoro hamutuk ho Irman sira komunidade B. Eusebia Palomino hasa’e agradese ba na’I, ba Sr. Paulina nia dedikasaun durante tinan haat nia laran hodi hala’o kna’ar nu’udar profesora no mós nu’udar Diretora Eskola ba tinan rua nia laran. Seremonia agradesementu ne’e partesipa husi aluno sira hotu husi Pre-Eskolar to’o alunu 3⁰ Ciclo.  Seremonia hahu dadeer ho Santa Misa ne’ebe prezide husi Pe. Cesar da Costa, SDB.

Iha homilia, padre fo hanoin ba alunu sira liu-liu kona-ba Na’in feto nia prezensa nu’udar inan ba alunos ida-idak no mós sai inan no gia ba madre sira hodi tau matan fali ba aluno sira ida-idak iha eskola ida ne’e. Padre dehan; “Ita agradese ba Maromak ba grasa hotu ne’ebe ita simu husi Na’i, liu-husi Me. Paulina nia prezensa nu’udar inan iha ita leet hanesan mós ita Inan Maria ne’ebe akompaña no gia ita. Bainhira ita nia fiar maka’as hanesan Maria, ita sei halo buat ne’ebe di’ak no sai santo, liu-husi hatudu hahalok respeitu ba inan-aman, fiar inan aman no edukadores sira, ne’e mak dalan atu sai santu. Iha silensio mak ita deskobre buat di’ak no buat aat ne’ebe ita halo ona. Hatene atu agradese no mos hatene atu perdua. Agora ba oin ita tenke haburas fiar rasik atu bele halo dezenvolve ita nia-an atu sai sarani ne’ebe di’ak liu tan hanesan Don-Bosco dehan sai sarani diak no sidadun honestu no laran metin iha Na’in feto o sei haree saida mak milagre.”

Depoizde Misa Padre fo momentu ruma hodi bolu fali aluno nain rua ne’ebe lori simbolo iha ofertorio hodi halo intervista oituan ho sira hodi dada aluno sira hotu nia atensaun no fo mensajen ba sira  atu hatene agradese nafatin. Iha momentu ne’e padre husu atu agradese ba Sr. Paulina nia ne’ebe ho domin tau-matan no akompaña ona aluno ida-idak.

Seremonia la remata ho Santa Misa, maibe kontinua nafatin ho konviviu ne’ebe alunu sira rasik mak dirije hodi halo aprezentasaun kanta, dansa no drama badak ruma husi klase nu’udar sira nia agradesementu ba Sr. Paulina. Husi Sr. Paulina parte mós agradese ba ema ida-idak nia prezensa liu-liu ba alunu no professor sira hotu nia prezensa tanba maske hasoru defikuldade oin-oin maibe la taka dalan ba nia atu la’o ba oin no mós husi prezensa labarik no profesores sira ida-idak tulun nia atu haburas liutan nia vokasaun nu’udar Saleziana.

Remata tiha mensajen husi Sr. Paulina, Professor Manuel reprezenta profesores sira hotu hato’o mós sira nia mensajen agradesementu nian ba Sr. Paulina hafoin alunu sira fila ba uma no Professores sira hela oituan tan hodi han hamutuk hodi fahe ksolok-amizade nian ba malu. Seremonia hala’o ho simpes maibe nakonu ksolok no hatudu amizade furak entre madre no professores sira.

(Suzana Alves)