Baucau – Sai ona tradisaun ida iha parókia S. António Baucau atu Na’i-Feto sai ba vizita uma-kain sira hotu durante fulan Maiu, fulan dedika ba Maria. Zona pastorál hotu-hotu ohin, 1 Maiu, halo abertura fulan marianu ho selebrasaun Misa Na’i-Feto nian, iha-ne’ebé sentru no sub-sentru ida-idak lori ninia estátua Na’i-Feto nian atu simu bensan durante Misa ne’e, hafoin hahú tama uma-uma sira.

Nune’e, mak ohin irmán FMA sira iha Baucau, haksolok atu la’o hamutuk ho Na’i-Feto ba uma-uma sira. Vizita família nian ne’e sai kontinuasaun ba vizita ne’ebé hahú tiha ona iha fulan Janeiru 2014 iha área Teulale no Dewake, iha tinan dedika ba família. Irmán sira ohin hahú tama iha sentru S. António nia sub-sentru sira hanesan Wailala; Maria Auxiliadora; Guarda;  Matadouro; Waibala.

Família sira haksolok atu simu Na’i-Feto iha sira nia uma no ba sira Na’i-Feto mak uma-na’in boot liu. Hanesan Evanjellu ba Misa abertura nian, família sira simu konvite atu simu Maria iha sira-nia uma, atu nia hanorin sira moris sira-nia kompromisu fiar nian. Jezús rasik mak hakarak Maria sai ita-nia Inan. Nu’udar inan, Maria nia preokupasaun boot mak ita koñese Nia Oan, halo esperiénsia kona-ba Jezús nia domin, katak husik Nia hadomi ita, tanba ne’e mak nia hatudu no haruka ita atu bá Jezús: “Imi halo tuir buat hotu ne’ebé Nia haruka” (Jo 2,5).

Maria mak inan tanba nia fó isin ba Jezús, Maromak nia Oan. Iha ita-nia moris mós nia hala’o maternidade hodi hahoris Jezús iha ita. Nia hakarak halo ita moris no sai tuir ilas nia Oan nian maibé ho kondisaun ida: ita simu no lori nia ho ita.

Padre Justiniano (pároku) iha ninia omilia husu atu família sira laran-metin nafatin ba Maria. “Nia nunka husik ita mesak… nafatin ho ita iha tempu di’ak no tempu aat nia laran.” Konvite seluk mak banati tuir ia-nia Inan nia virtude sira, nune’e moris duni ita-nia identidade nu’udar Maria nia oan sira.