Papa Francisco nia katekeze kona-ba don Espíritu Santu nian – 23 Abríl 2014

Liutiha períodu Oitava Páskua nian, Papa Francisco kontinua, iha kuarta 30 Abríl, siklu katekeze kona-ba don Espíritu Santu nian. Don ne’ebé Amu-Papa reflete mak don entendimentu nian, ne’ebé liga ho modu íntimu ho fiar, basá nia tulun atu haree situasaun sira ho Maromak nia intelijénisa, la’ós ho ema nian.

Asesu Katekeze ho lia-portugés

 

“Ida-ne’e la’ós intelijénsia umana, kapasidade intelektuál atu iha kbiit eh lae. Maibé don ida ne’ebé halo sarani ida iha kbiit atu ultrapasa aspetu esteriór realidade nian atu hateke kle’an ba Maromak nia hanoin no ninia planu salvasaun nian”, Papa Francisco esplika.

 

“Don ne’e halo ita komprende sasán sira hanesan Maromak komprende, ho intelijénsia Maromak nian. Basá ema bele komprende situasaun ida ho itelijénsia umana, ho prudénsia, no ne’e di’ak. Maibé atu komprense situasuan ida iha profundidade, hanesan Maromak komprende, ne’e efeitu ida husi don ne’e. No Jezús hakarak haruka Espíritu Santu atu ita iha don ne’e, atu ita hotu bele komprende sasán sira hanesan Maromak komprende, ho Maromak nia intelijénsia. Ne’e mak prezente ida Na’i haraik mai ita hotu”.

Nune’e, don entendimentu nian iha ligasaun direta ho fiar. Amu-Papa esplika katak, bainhira Espíritu Santu horik iha fuan no ema nia intelijénsia, ninia komprensaun  kona-ba buat ne’ebé Jezús hateten no realiza sai boot.

Hodi hanoin katak Kristu rasik promete katak Espíritu Santu sei fó hanoin kona-ba Ninia hanorin sira, Papa Francisco temi epizódiu dixípulu na’in rua nian iha dalan ba Emaús, iha Evanjellu Lucas nian. Bainhira sira rona Jezús nia esplikasaun iha Eskritura sira katak, Nia tenke terus no mate no hafoin moris-hias, sira nia neon sai nakloke no esperansa moris fali iha sira-nia fuan.

“Ida-ne’e mak Espíritu Santu halo: loke ita-nia neon atu komprende di’ak liután Maromak nia hanoin sasán sira, ema nia sasán sira, situasaun no buat hotu”.

Amu-Papa taka katekeze hodi destaka importánsia don entendimentu nian ba moris sarani. “Importante tebes don entendimentu nian ba ita-nia moris sarani! Ita husu Na’i atu haraik don ne’e atu ita komprende, nune’e mós Nia, buat hotu ne’ebé akontese, no atu komprende, liuliu, Ninia liafuan sira iha Evanjellu”.