Dili – Centro João Paulo II, ohin, 28 Abríl, sai venue ba selebrasaun aniversáriu dahuluk pontifikadu Papa Francisco nian. Selebrasaun ne’e organiza husi nunsiatura nia  reprezentante iha Dili. Iha selebrasaun ne’e marka prezensa embaixadór sira no korpu diplomátiku sira, membru governu Timor-Leste nian, ho modu partikulár, vise-primeiru ministru, Senór Fernando de Araújo, amlulik diosezanu no relijiozu/a sira husi kongregasaun oioin no mos reprezentante relijiaun seluk.

 

Selebrasaun hahú ho inu Pontifísiu Romanu no inu nasionál Timor-Leste nian, ne’ebé hananu husi koru Santa Cecília. Hafoin iha diskursu rua: ida husi Núnsiu Apostóliku, D. Joseph Marino no ida fali husi Vise-primeiru ministu, señór Lasama.

Iha ninia diskursu Núnsiu ko’alia kona-ba selebrasaun ne’e nia objetivu katak, atu selebra aniversáriu pontifikadu Papa Francisco nian nu’udar Bispu Roma nian no Ulun Kreda nian. Husi selebrasaun horisehik iha Tasi-Tolu, Núnsiu hakfodak ho prezensa sarani sira-nian ne’ebé liu rihun 30.000 ne’ebé hatudu sarani sira nia domin ba Amu-Papa no ba Kreda. Hafoin nia foti fali Papa Francisco nia liafuan sira iha omilia ne’ebé dehan katak “Santu rua ne’e amlulik, bispu no papa sira sékulu XX nian. Sira hatene trajédia sira sékulu nian, maibé trajédia sira la manán sira. Maromak mak forte liu iha sira; sira-nia fiar iha Jezús Kristu mak forte liu, Makso’ik ema nian no na’i istória nian; Maromak nia laran-sadia mak forte liu iha sira, ne’ebé hatudu liha kanek lima Jezús nian; Maria nu’udar inan nia prosimidade mak forte liu. Iha ema na’in rua, kontemplativu Kristu nia kanek nian no sasin ba Ninia laran-sadia, horik «esperansa moris ida», hamutuk ho «ksolok ne’ebé liafuan la to’o atu haktuir no nabilan» (1 Ped 1, 3.8)”.

Señór Fernando fali, iha ninia liafuan sira fó parabéns ba Amu-Papa Francisco no hato’o sarani sira nia ksolok tanba ho Papa foun ne’e vida sarani sai dinámiku litán, esperansa boot liután, universál liután… Nia mós hato’o hikas konvite ba Papa Francisco atu hiit an mai vizita Timor-Leste hodi Governu nia naran, no hateten katak se horisehik Tasi-Tolu nakonu ho ema, bainhira Papa mai Dili sei naresin, la’ós de’it ho Timor oan sira maibé ho viziñu sira mós, ne’ebé hakarak simu Amu-Papa nia bensan. Razaun konvite ne’e la’ós de’it tan domin no fidelidade ba Kristu nia saseluk, maib´emós tanba tinan oin Kreda Timór selebra tinan 500 ninia prezensa. Tuir Senór Fernando, liuhusi Primeiru Ministru Xanana, governu tau ninia prioridade boot harii konstrusaun nunsiatura iha Motael.

Hotu tiha diskursu sira, Núnsiu loke brinde onra nian ba selebrasaun ne’e ho cocktail party enkuantu akompaña ho dansa kulturál ida aprezenta husi grupu S. António.