Dili – Loron dahaat Kapítulu Inspetoriál, hahú ho Laudes no Santa Missa ne’ebé prezide husi Pe. Mario do Rosário SDB.

Loron ne’e dedika ba pergunta datoluk ne’ebé husu kona-ba “hilin ida-ne’ebé de’it mak bele halo komunidade sira sai sinodál iha estilu animasaun no governu, sinerjia entre vokasaun diferente, ba misionariedade profétika ida?”

Atu prepara ba serbisu, Kapitulár sira asiste vídeo ho títulu “When You Believe” husi grupu “El Gamma Penumbra” ne’ebé koalia kona-ba oinsá hahú ita nia moris iha mundu ne’e to’o finalidade ho di’ak, katak “moris-hi’as”. Video ne’e fó inspirasaun ba kapitulár sira atu haree atitude saida mak favorese Komunidade sai sinodál iha estilu animasaun no governu no saida mak sai obstákulu. Me. Jacinta Gusmão nu’udar reguladora husu ba Kapitulár sira atu iha grupu laran deskobre atitude saida de’it mak bele tulun no bloka hodi la hala’o misaun edukativa.

Iha aprezentasaun ba Asembleia, grupu balun evidensia atitude  uniaun ka konverjénsia finalidade nian, domin, fiar, responsabilidade ba ida idak nia knaar, koresponsabilidade, hatene agradese; aleinde ne’e iha mentalidade projetuál no tau nafatin Maromak iha moris nia sentru. Entre atitude ka hahalok ne’ebé bloka mak individualizmu, indiferente, baruk-teen ka la iha entuziazmu, la iha haraik-an no auto-referensiál, menus iha komunikasuan no diálogu, la iha vado io, sai patraun ba knaar rasik, nst.

Depoizde partilla kona-ba video, grupu sira halo esperiénsia oinsá serbisu hamutuk hodi prepara “Rozáriu” ida, fahe ba grupu ida-idak ho kreitividade.

Iha loraik grupu serbisu ho instrumentu serbisu nian hodi hatán ba pergunta Kapítulu nian kona-ba hilin sira ne’ebé favorese komunidade sinodál ho estilu animasaun no governu, iha sinerjia entre vokasaun diferente, nune’e bele hala’o misaun iha profesia.

 

(Komisaun Komunikasaun)