Angelus-Papa Francisco

Maun no biin-alin sira, bondia!

Missa selebra ohin dadeer iha Saun Pedro taka Asembleia Espesiál Sínodu Bispu sira-nian ba Rejiaun ‘Pan-amazónika’. Leitura dahuluk, husi Livru Ben Sira, fó hanoin mai ita kona-ba pontudepartida iha dalan ida-ne’e: ema kiak nia invokasaun, ne’ebé «hakat kalohan sira», basá «Maromak rona ema opresu nia orasaun» (Sir 35,21.16). Ema kiak nia hakilar, hamutuk ho ida rai nian,to’o mai husi Amazónia. Depoizde semana tolu ne’e ita labele halo fudin la rona. Ema kiak nia lian, hamutuk ho ema sira seluk iha li’ur husi Asembleia sinodál – Pastór sira, foin-sa’e sira, sientista sira – ne’ebé dudu ita atu keta hela indiferente. Ita sente beibeik fraze “orsida ne’e tarde liu ona”: fraze ne’e labele sai slogan de’it.

Saida mak Sínodu? Hanesan liafuan ne’e dehan, la’o hamutuk, hetan konfortu husi korajen no konsolasaun ne’ebé mai husi Na’i. Ita la’o hamutuk hodi hateke iha ita-nia matan sira no hodi rona malu, ho sinseridade, la hodi subar difikuldade sira, hodi esperimenta beleza atu la’o ba oin hamutuk atu serví. Apóstolu Paulo estimula ita iha leitura daruak ohin nian: iha momentu dramátiku ida ba nia, enkuantu atu “saran nian an nu’udar oferta – katak hetan tesi-lia – no katak momentu ne’ebé atu husik moris ne’e” (kf 2 Tm 4,6), hakerek, iha momentu ne’ebá: «Maibé Na’i besik ha’u no haraik kbiit mai ha’u, atu ha’u bele lori to’o rohan anúnsiu Evanjellu nian no ema hotu rona nia» (v. 17). Ne’e mak Paulo nia hakaran ikus: la’ós buat ida tan buat ne’e ka buat ruma ba ninian sira, maibé ba Evanjellu, atu bele haklaken ba ema hotu. Ida-ne’e mai uluk no vale liu buat hotu. Mai ita ida-idak ema husu dalabarak buat di’ak saida atu halo ho moris rasik; ohin mak momentu; ita husu mai ita-nia an: “Buat di’ak saida mak ha’u bele halo ba Evanjellu?”

Iha Sínodu ita husu ba an rasik, ho hakaran atu loke lurón foun sira ba anúnsiu Evanjellu nian. Ita haklaken de’it buat ne’ebé ita moris. No atu moris husi Jezús, atu moris husi Evanjellu tenke sai husi an rasik. Nune’e, ita simu impulsu atu tama kle’an, atu husik tasi-ibun konfortavel ita-nia portu seguru sira nune’e tama iha bee kle’an sira: la’ós iha bee-nalihun ideolojia sira-nian, maibé iha tasi luan iha-ne’ebé Espíritu konvida ita atu soe dai sira.

Ba dalan ne’ebé sei mai, ita invoka Virjen Maria, ne’ebé ita venera no hadomi nu’udar Liura-Feto Amazónia nian. Nia sai liurai-feto la’ós hodi konkista, maibé hodi “inkultura an”: ho korajen haraik-an inan nian nia sai protetora ba ninia ki’ik-oan sira, iha defeza ba sira ne’ebé hetan opresaun. Nafatin hodi la’o ba povu sira nia kultura. La iha kultura standard ida, la iha kultura pura ida, ne’ebé purifika sira seluk; iha Evanjellu, puru, ne’ebé inkultura. Ba Nia, ne’ebé iha uma kiak Nazaré nian tau matan ba Jezús, ita saran oan sira ne’ebé kiak liu no ita-nia uma komún.