Dili – Partisipante hamutuk na’in 44 husi FMA no mós konvidadu sira husi Família Saleziana ohin, 25 Outubru, fó inísiu ba Kapítulu Inspetoriál FMA sira-nian.  Partisipante sira Konselleira sira, Superiora sira, delegada komunidade no inspetoria nian, SDB sira, hanesan Pe. Ilídio no Pe. Mário Sousa; ADMA, Antiga Aluna Adélia no Mariana, foin-sa’e na’in tolu, inklui Afonso Alves, nu’udar prezidente MJS. Salezianu Kooperadór mós hetan konvite maski ohin labele partisipa iha abertura.

Depoizde invokasaun ba Espíritu Santu, Ir Alma, Inspetora FMA TIN no Prezidente ba Kapítulu Inspetoriál mak loke Kapítulu ho ninia liafuan sira, hodi konvida atu fó importánsia ba momentu grasa nian ida-ne’ hodi halo “revizaun, reflesaun , dixernimentu no programasaun”. Ir Alma dehan katak ohin Espíritu Santu fó prezente mai ita “leitura sira” ba momentu ne’e: “hatene distinge ka dixerne sinál sira tempu nian”. Hodi foti indikasaunhusi tema Kapítulu Jerál 24, i.e. “Imi halo tuir buat ne’ebé Nia haruka”, Irmán Alma husu atu ita “rona, nakfilak buat ne’ebé falta ba buat foun” no “haluan hateken”.

Ir Alma fó hanoin fali Ir Maria Luisa Miranda, Konselleira Jerál ba Família Saleziana nia liafuan sira ne’ebé foin remata nia vizita ohin iha Inspetoria: “Kapítulu mak momentu atu atualiza karizma”, basá “se halo didi’ak Kapítulu Inspetoriál sei halo di’ak mós Kapítulu Jerál”.

Depoizde abertura, Ir Jacinta Gusmão, nu’udar Reguladora ba Kapítulu Inspetoriál aprezenta “Regulamentu ba Kapítulu Inspetoriál”, oráriu no metodolojia serbisu nian. Ir Jacinta subliña knaar oioin ba funsionamentu di;ak Kapítulu nian, komisaun sira ho sira-nia responsabilidade sira, modalidade diskusaun no votasaun iha Asembleia, deliberasaun Kapítulu nian no Eleisaun ba Delegada ba Kapítulu Inspetoriál,Enserramentu Kapítulu nian.

Momentu importante tuirmai mak “Adorasaun” ne’ebé subliña atitude “rona no dixerne”, durante oras rua nia laran.

Iha “Buonanotte”, Ir Alma Castagna, hodi refere ba Evanjellu loron 26Outubru nian kona-ba “ai-figeira ne’ebé estéril” nia konvida atu hanoin mós ba ita-nia Inspetoria, ne’ebé depoizde Verifika Tinan 3, ita hadi’ak ita-nia moris, “ita fó fuan ka lae?”, ka “ita husik liu de’it?”.

Ita-nia serteza mak “Maromak nia Espíritu horik ho ita”. No ita  bele fó fuan se “buat hotu ita halo , halo husi interioridade”, husi laran no ho entuziazmu.

(Komisaun Kapítulu Inspetoriál)