Fatumaka – Loron ida-ne’e mak loron ne’ebé Ir Maria Luisa Miranda, konselleira jerál Ámbitu Família Saleziana nian dedika ba soru-mutu ho ADMA. Enkontru halo iha Fatumaka no prezente ADMA sira husi Baucau, Balide (Dili), Venilale, Fatumaka no Vemasse, hamutuk na’in 90, maski tuir informasaun, ADMA iha Timor-Leste iha grupu 35 no membru hamutuk 1070. Maibé iha inísiu ninia enkontru, Ir Maria Luisa Miranda dehan kedas katak “la importante númeru maibé kualidade”.

Iha enkontru ne’e, Ir Maria Luisa hakarak hametin liután identidade ADMA nian hodi aprezenta ba sira oinsá Don Bosco harii grupu ADMA. Iha Don Bosco nia moris nia hari’i buat ruma importante liu iha nia moris, iha tinan lima nia laran, bainhira nia sente katak Maria Auxiliadora halo ba nia moris, nia sente nesesidade atu agradese Na’i-Feto. Nia halo buat tolu: ida uluk halo buat ruma ho fatuk: “Bazílika Maria Auxiladora” iha Torino; daruak, buat ne’ebé liga metin ba Bazílika mak Asosiasaun ADMA; datoluk Institutu “Filhas de Maria Auxiliadora”, nu’udar monumentu moris  hamutuk ho ADMA. “Buat tolu ne’e mak Don Bosco nia agradesimentu ba Na’i-Feto iha tempu”.

Ir Maria Luisa subliña espiritualidade ADMA nian hodi haktuir fali Don Bosco nia mehi “Koluna rua nian”, koluna Santíssimu Sakramentu no koluna Maria Auxiliadora nian. Iha mehi ne’e hatudu katak Kreda metin hasoru persegisaun hotu se kesi an ba koluna rua ne’e. Don Bosco hakarak atu asosiasaun ADMA iha ai-riin rua ne’e atu suporta apoia imi-nia família. Asosiasaun ne’e oferese dalan santidade nian no apostoladu nian. Ir Maria Luisa dehan katak la to’o peregrinasaun, rozáriu, maibé koluna rua ne’e tenke apoia imi-nia moris. Fatin apostoladu ba ADMA mak uluknanai família. “Atensaun: ohin família iha perigu” atu moris nu’udar família, nu’udar sarani.

Hafoin nia mós dehan katak Na’i-Feto bainhira hatudu fatin atu harii Bazílika, nia dehan “Iha ne’e ha’u -nia uma no husi ne’e ha’u-nia glória”. Nune’e nia husu atu ADMA ida-idak, ninia famíla, bele sai Maria nia uma no Maria nia glória.

Enkontru hotu tiha iha Santa missa iha Santuáriu ho selebrante Pe. Manuel Ximenes SDB, delegadu ba ADMA no tuirmai almosu hamutuk.