Baucau – Komunidade edukativa S. Teresa d’Avila, Baucau ohin 25 Abríl 2014, antisipa selebrasaun  loron gratidaun ba Madre Jerál Yvonne Reungoat ne’ebé loloos monu iha loron 26 Abríl. Antisipasaun ne’e tanba koinsidénsia furak ho agradesimentu komunidade edukativa nian ba  vizita kanónika  provinsiál FMA nian, Ir Paola Battagliola, ne’ebé mós atu remata daudaun. Se Madre Jerál mak talin uniaun Institutu tomak nian, provinsiál nu’udar reprezentante  Madre Jerál nian mak talin uniaun entre komunidade sira Inspetoria ida-nian no Inspetoria nian ho Institutu.

 

Selebrasaun hahú ho Eukaristia prezide husi padre David Savio SDB, iha tulu 11:00 ho animasaun litúrjika husi grupu Madre Mazzarello, kompostu husi menina sira ne’ebé hakarak deskobre Maromak nia projetu ba sira. Iha ninia omilia padre David konvida hotu-hotu atu moris iha ksolok no gratidaun tanba Maromak hasai ona ita-nia rate nia odamatan no fatuk sira hodi halo ita hetan moris foun.  Misa ninia intensaun mós atu invoka don hotu Espíritu Santu nian ba Madre Jerál, ba provinsiál no ba membru hotu Família Saleziana nian atu halo karizma sai fekundu no signifikativu ba beibeik.

Hotu tiha Eukaristia, kontinua ho almosu hamutuk. Partisipante hotu partilla buat ruma ba almosu ne’ebé prepara husi  inan sira no membru sira komunidade edukativa nian. Hanesan baibain, selebrasaun la kompletu se la iha dansa, knananuk no poezia, nune’e mós dansa dua-kali, sentidu…

Iha ninia liafuan sira ba partisipante hotu, irmán Paola agradese prezente hotu atu selebra hamutuk festa agradesimentu ne’ebé hala’o iha otava Páskua nian. Nia mós fahe ba hotu medalla Maria Auxiliadora nian.

Partisipa iha selebrasaun ohin, la’ós de’it labarik no foin-sa’e sira, maibé mós membru sira ADMA nian no Antigas Alunas sira, ho totál ema 350.

Atu kontinua ho espíritu selebrasaun gratidaun nian, komunidade gia husi Ir Paola, halo “prayer-sharing” kona-ba Madre Mazzarello nia surat 55 hodi rona Espíritu nia lian ba ema ida-idak no ba komunidade, ohin loron, hanesan sujestaun mai husi Inspetoria  Bahia Blanca, Argentina, ne’ebé sai fatin ba selebrasaun loron gratidaun mundiál ba Madre Jerál.