Dili (Comoro) – Iha 19 Outubru 2019, Madre Konselleira Jerál husi Ámbitu Família Saleziana, Madre Maria Luisa Miranda, FMA  hasoru malu ho Antiga/ u aluna/u sira kuaze 250, ne’ebé simu iha Eskola Maria Auxiliadora Comoro  ho ho dansa tradisionál no fó hatais Tais ba madre hodi hatudu Identidade Timor oan no mós sai nu’udar inan ida ne’ebé mai vizita  nia oan sira no tempu hanesan mós loke KonFederasaun Antiga/u aluna/u FMA nian ba dala uluk iha Timor-Leste.

Iha Ir Maria Luisa nia ko’alia ho foin-sa’e AA sira  kona-ba Identidade Antiga/u Aluna/u no fó importánsia liu ba sira atu hametin unidade entre grupu Antiga/u sira, tuir regra dahuluk nian ne’ebé hetan inspirasun husi Don Filipi Rinaldi no Sr. Caterina Arrighi ho motivasaun 3 ne’ebé fó sai iha Valdoco iha loron 19 Marsu 1908 Simples maibé kle’an no klaru ninia finalidade mak tuir mai ne’e:

1. Hamoris valór sira ne’ebé simu iha uma Saleziana sira
2. Tau matan ba Família no moris tuir valór Kristaun nian ho di’ak
3. Tulun malu entre Antiga/u aluna/o no sira seluk ne’ebé presiza liu tulun.

Tuir mai esplika estatutu konfederasaun hodi dehan katak Asosiasaun ne’e hola parte iha Família Saleziana, promove husi Filhas de Maria Auxiliadora no Reitor Mór Don Bosco- Don Bosco nia Susesór mak aman no Sentru unidade nian.

Asosiasaun ne’e mak feto no mane sira ne’ebé forma ona husi FMA sira nia uma, independente husi sira nia relijiaun, kultura Sosiál no étnika ne’ebé hakarak fahe, haklean no fó sasin ba valor sira umanu no relijiozu nian iha ne’ebé sira hetan edukasaun tuir Sistema Preventivu Don Bosco nian.

Misaun Asosiasaun nian mak atu nakfilak moris rasik iha roman Espiritualidade Saleziana nian too sai sarani ne’ebé di’ak no sidadaun onestu hodi la’o tuir Don Bosco no Madre Mazzarello sira nia ain-fatin.

Iha estatutu Konfederasaun nian ne’ebé hetan espesifíiku iha artigu 4.1 finalidade Asosiasaun nian mak:

1. Partisipa iha misaun Edukativa FMA nian no iha ambiente sira ne’ebé serbisu ba.
2. Empeña an iha promosaun no edukasaun feto nian, defende moris no Família
3. Sustenta ba defesa direitus dame nian
4. Favorese kontrusaun foin-sa’e protagonista
5. Fó opiniaun ba diálogu no nakloke ba diálogu
6. Tau matan ba asosiasaun no hafoun an naffatin
7. Hametin valór edukasaun ne’ebé simu husi uma Saleziana sira

Tuir mai Irmán Maria luisa fó pose ba estrutura foun konfederasaun Antiga/u aluna/u FMA nian ho Prezidente mak Cipriano Oliveira de Almeida Freitas, Vise mak Saturnina Fernandes de Jesus, Sekretária mak Maria Fatima Pereira Guterres no Tesoureira mak Natalia Rocha da Costa.

Enkontru ne’e tako ho divertimentu no ksolok hamutuk iha lokraik nian ho Madre Maria Luisa nia prezensa.

(Ines Bartolo Freitas)