Ho prezensa Konselleiru/a Jerál Familia Saleziana halo formasaun konjunta
Dili – Loron 18 Outubru 2019, mak loron ne’ebé signifikativu ba Familia Saleziana iha Timor-Leste tamba ba dala uluk mak hala’o formasaun konjunta entre grupu sira hotu ne’ebé hola parte ba Familia Saleziana: SDB, FMA, Salesianos cooperadores, ADMA, Antigos/as alunos/as SDB no FMA ho prezensa Konselleira Jerál FMA ba ámbitu Família Saleziana, Ir Maria Luisa Miranda no Konselleiru Jerál SDB ba rejiaun Ázia-Pasífiku, Pe. Vaclav Klement. Partisipante sira hamutuk ema na’in 95.
Enkontru hahú ho selebrasaun Eukarístika iha Kapela CENTEK-Comoro, prezide husi padre Provinsiál, Pe. Apolinário Neto, SDB. Depoizde missa, kontinua ho formasaun iha Centro João Paulo II – Comoro, liu husi konferénsia sira.
Ir Maria Luisa Miranda, FMA, konselleira ba ámbitu Família Saleziana mak hahú ho tópiku: “Iha tempu susar, Maromak nia belun sira sai forte”. Santidade iha Familia Saleziana ohin loron. Iha diskursu Irmán Maria Luisa subliña prioridade sira atu kultiva iha ita nia sosiedade ohin loron nian mak buka (searching). Prioridade sira ne’e mak:
- Primadu Maromak Nia Liafuan
Iha kontestu ida ne’e Maromak nia liafuan, hola dimensaun espesiál ba ema fiar-na’in sira. Prioridade boot ida mak atu kuda, hanesan Evangelli Gaudium afirma, katak estuda Sagrada Eskritura.
- Kontemplasaun no Dixernimentu
Husi Maromak Nia Futar lia no hodi le’e sinal sira tempu nian, ita nia grupu sira simu bolu atu ezersísiu dixernimentu. Dixernimentu nudar ezame, nu’udar avaliasaun no taes entre saida mak auténtiku no saida mak lae, hodi tuir instrusaun apóstolu s. João: “Ha’u nia belun sira, keta fiar sira hotu ne’ebé dehan katak espíritu hela ho sira”, koko sira atu hatene loloos espíritu ne’ebé hela ho sira mai duni husi Maromak ka lae, basá profeta bosok barak mosu iha fatin hotu-hotu”.
- Eukaristia no Rekonsiliasaun
Hanesan D. Bosco nia mehi kona ai-riin rua: Na’i-Feto no Eukaristia. Don Bosco haktuir iha nia boa-noite ida: “Loron difisil nian ba Kreda prepara tiha ona. Iha dalan rua de’it mak salva imi an iha rungu-ranga nia leet! Devosaun ba Maria Santíssima no hakabesik ba Sakramentu sira”.
- Mariolojia tuir tempu nian
Ba Familia Saleziana, Maria nia prezensa ho títulu “Auxilium Christianorum”, Tulun’na’in Sarani sira nian, mak presenza inspirasaun nian: modelu feto no fiar-na’in sira, mestra no inan ne’ebé tulun, gia, proteje no eduka ita iha prezente hodi serbi maun alin sira.
Irmán Maria Luisa remata ninia konferénsia ho liafuan ruma foti husi Michel Quoist ne’ebé enkoraja ita atu kontinua ho laran-luak no espíritu determinasaun ba hasoru iha ne’ebé Maromak bolu ita ba.
Se nota dehan: nota ida labele halo melodia…sei laiha sinfonia
Se liafuan dehan: liafuan ida labele halo pájina ida… sei laiha livru ida
Se fatuk dehan: fatuk ida labele harii baki ida…sei laiha uma
Se udan ida dehan: bee turuk ida labele forma mota ida…sei laiha oseeanu
Se trigu musan dehan: trigu ida labele kari iha kampu…sei laiha tempu ko’a nian
Se ema ida dehan: Jestu domin ida labele soi umanidade … sei nunka iha justisa ka dame ka dignidade ka ksolok iha ema moris nia rain
Nu’udar sinfonia presiza nota ida-ida, nu’udar livru presiza liafuan ida ida, nu’udar uma presiza fatuk ida ida, nu’udar oseanu presiza bee turuk ida ida, nu’udar tempu ko’a presiza musan ida ida, no umanidade tomak presiza ó, iha ne’ebé de’it iha ba, tamba ó mak úniku, no tan ne’e ema ida labele troka netik ó.
Pe. Klement SDB iha nia diskursu nia ko’alia kona-ba Dixernimentu ba Kreximentu misionáriu iha Familia Saleziana:
- Rona: loke matan ba dinámika mundial igreija misionária nian, tuir Amu-Papa Fransisco nia hanorin.
- Interpreta: komprimisu pesoál ho igreja misionária – aprende husi misionáriu/a Familia Saleziana nian.
- Dalan atu tuir: kontribusaun ba kreximentu komuñaun misionária iha Familia Saleziana.
Pe. Klement remata nia diskursu hodi husik pergunta ida ba asembleia: “Kontribusaun saida mak ha’u fó ba fulan misionáriu ida-ne’e?”
Molok remata enkontru ida ne’e, iha momentu ikus fó tempu ba Asembleia atu husu pergunta ka fahe reflesaun ruma kona-ba konferénsia no formasaun konjunta ida-ne’e.
Enkontru taka ho almozu konfraternizasaun nian nu’udar Familia boot Don Bosco no Madre Mazzarello nian.
(Suzana Alves)
