Dili – Konselleira ba ámbitu Família Saleziana, Ir Maria Luisa Miranda hahú ohin, ninia vizita animasaun nian iha Inspetoria FMA Timor-Indonesia (TIN).

Loron dahuluk ninia vizita nian, nia hasoru Konselleira Inspetoriál sira hodi ko’alia ba sira kona-ba animasaun ba “misaun partillada ba karizma salezianu nia kontinuidade”.

Nia hahú hodi dehan katak Inspetoria TIN mak prezensa joven ida, ho diversidade ema nian, rai nian, obra nian, ho perspetiva futuru ne’ebé sei husik iha rai-na;in nia liman. Nune’e, presiza tau atensaun ba abut karizma nian ne’ebé tenke iha profundidade, basá bainhira iha profundidade nia sei forte atu hasoru tempestade sira. Responsabilidade boot iha Timor-oan sira nia liman, katak atu kontinua buat ne’ebé msionária sira hatutan mai ita hodi “fó kór, tón, sabór” rai nian hodi la halo traisaun ba buat ne’ebé esensiál karizma nian.

Se importante atu FMA ida-idak tau abut kle’an, nune’e mós importante atu Família Saleziana tau abut kle’an iha karizma. Família Saleziana moris, sai boot no konsolida se iha abut forte, metin”, Ir Maria Luisa salienta. Ir Maria Luisa halo pergunta ida-ne’e: “Serve ba saida iha oratóriu, eskola, orfanatu, nst, se ita la pasa karizma?”

Ohin loron iha modu 32 atu moris karizma salezianu iha Família Saleziana. Ir Maria Luisa lamenta katak iha FMA no SDB sira iha “kultura kiak liu, superfisiál kona-ba Família Saleziana”. Se ita la hatene “Carta de Identidade da Família Salesiana”, la koñese estatutu sira grupu Família Saleziana seluk, ita la hatene mós propoin, la hatene hatán ho modu seguru, la hatene anima”. Ita hatene katak, “Rikusoin Família Saleziana nian la’ós mai ita de’it maibé ba Kreda… Hodi nia ita multiplika “Di’ak”.

Ir Maria Luisa dehan katak ita presiza halo Família Saleziana nia moris tuir siklu moris nian. Hanesan iha família normál tempu atu tau oan iha mudnu la’ós bainhira sai ona katuas-ferik, nune’e mós ita keta hein to’o katuas ferik mak pasa karizma ba ema seluk, liuliu ba leigu sira. Nia konta esperiénsia ida iha Rai ida iha-ne’ebé kolaboradór sira la koñese ita-nia abut: “Ha’u triste atu hatene katak, iha leigu sira empeñadu no serbisu ho ita tinan 15 no la koñese Don Bosco nia mehi tinan 9 nian. Ne’e katak ita la pasa karizma”.

Hodi fó ezemplu kona-ba País sira ne’ebé ditadura ideolojia kontra sarani sira ukun, Ir Maria Luisa dehan katak, “ita tenke prepara ba futuru, agora, la’ós bainhira akontese ona”. Akontese katak, “iha rai sira hanesan Cuba, China, leigu sira, Salezianu Kooperadór sira mak lori ba oin karizma salezianu”, nia hatutan.

Ita presiza hateke filafali ba ita-nia Fundadór sira. Ba Don Bosco “edukasaun mak obra ida sinerjia nian: presiza barak atu eduka. Eduka mak obra korál ida”. Tan ne’e mak nia harii asosiasaun kooperadór sira nian. Fundasaun iha España mak serbisu hamutuk entre kooperadora leiga ida Doroteia ho Don Bosco… iha ninia inísiu nia misaun nia envolve ema barak, husi padre diosezanu ba patraun sira fábrika nian.

Madre Mazzarello mós sempre envolve ema seluk, aman-inan, postulante sira mós. Atu kaer eskola Mornese nian, nia entrega ba leiga ida: “Emilia Mosca”. Iha Mornese no iha Nizza Monferrato iha mestra leiga sira no mós mestre (mane) sira. Edukasaun korál importante tebes tanba ho kompleksidade realidade nian, hetok presiza liután kompeténsia oioin.

Tan ne’e, konvite boot atu promove assosiasaun sira leigu sira-nian hanesan “Antiga/u aluna/u sira, ADMA, Salezianu/a Kooperadór/a sira. Ne’e mak meiu ida atu esprime karizma iha diversidade no halo sai barak buat di’ak iha mundu ne’e. Ir Maria Luisa husu: “Joven sira ba ne’ebé bainhira sai adultu?” Depoizde sai husi oratóriu, sai husi animadór, sira ba iha-ne’ebé? Sira bele kontinua sira-nia dalan iha Saleziau Kooperadór, iha ADMA… Tan ne’e, hanesan Ir Alma Castagna nia observasaun, presiza iha ligasaun entre Pastorál Juveníl no Família Saleziana.

Ita hein atu membru Família Saleziana hotu bele tau abut metin iha karizma atu nune’e hamutuk bele sai evanjelizadór tuir estilu salezianu.