Jakarta (Indonesia) – Andrie Wongso mak motivadór n.1 Indonesia nian. Nia hetan konvite husi sarani leigu sira husi  “Wilayah st Yohakim” Parókia St. Yohanes Bosco Jakarta (15 Jullu 2012) atu  ko’alia kona-ba oinsá hetan susesu ho tema “Discover the Diamond in You”.  Andrie Wongso fahe nia esperiénsia moris rasik ne’ebé nia dehan nu’udar aprendijazen ida ne’ebé la hotu to’o ohin loron. Husi família kiak, eskola elementár la remata, nia hasoru dezafiu sira moris nian to’o hetan susesu. Nia xave?  Tuir Andrie Wongso, loloos ita ema moris mai hamutuk ho prezente oioin Maromak haraik, ita lori iha ita-nia laran fatuk murak “luar biasa” estraordináriu oioin; ita presiza de’it deskobre fatuk-murak ka diamante sira ne’e hodi halo nia serve ba moris; Diamante sira ne’e maka:

1. Kbiit hanoin nian (the power of mind). Diamante  uluk liu ema iha mak ninia hanoin. Susesu hahú iha hanoin: idealiza, vizualiza no materializa. Kbiit hanoin nian ne’e boot tebes. Produtu hotu realiza mundu nian. Maun-alin Wright loron ida imajina, hanoin, hakarak atu ema semo, nune’e iha 1902 sira-nia hanoin no vizualizasaun sai konkretu ho invensaun aviaun nian. Buat ne’e iha liur mak reflesu husi buat ne’ebé iha laran. Ema nia susesu la depende ba nia oin, maibé husi mentál no hanoin. Ba Andrie Wong “susesu mak ema ida nia direitu”. Presiza evita hanoin negativu sira, la iha fiar an, ta’uk dezafiu sira, labele “mamar” ho an rasik no rende de’it ba situasaun. Ita labele sai ki’ak mentál, tanba kiak mentál kontráriu ba susesu. Susesu presiza barani, presiza vontade presiza, susesu presiza badinas, presiza kompromisu. Nune’e edukasaun importante liu atu hariku hanoin, loke neon ba orizonte boot liu, sai kriativu.
2. Kbiit vontade nian (the power of will). The power of will maka kbiit vontade nian, fatuk-murak atu loke dalan ba susesu.  Se ita iha fiar boot hanesan mostarda musan bele akontese milagre. Ne’e katak kbiit hakaran nian ne’ebé nakonu ho konvikasaun no aten-barani atu luta ba buat ne’ebé hanoin atu to’o. Se ita iha hakaran susesu nian, 50 % susesu iha ona ita-nia liman, no se ita hala’o hakaran ida-ne’e ita-nia susesu sai 100%.
3. Kbiit karákter nian (the power of character) iha influensia bootbba susesu. Ema ne’ebé ema sira gosta baibain iha karákter atraente no bele dehan aspirante susesu nian. Fatuk-murak karákter ne’ebé di’ak tenke lori ita ba relasaun di’ak ho ema seluk, hatene adapta an, no umaniza ema seluk. Presiza riku mentál, katak gosta dezafiu, iha responsabilidade, dixiplina no respeita tempu, hadomi servisu, iha dedikasaun, la deskoraje lalais. Nadia Comaneci, kampeán olimpiade nian dehan: “Ha’u la halai husi dezafiu tanba ta’uk. Maibé iha kontráriu, ha’u halai hasoru nia tanba dalan ida mesak atu halakon ta’uk mak sama rahun nia iha ai-okos”. (I don’t run away from a challenge because I am afraid. Instead, I run toward it because the only way to escape fear is to trample it beneath your feet).
4. Kbiit empeñu/kompromisu nian (the power of commitment), kbiit atu iha aten-barani luta 100% ba objetivu boot ne’ebé iha ona to’o, halo ain-hakat sira, realiza objetivu to’o  hetan susesu. Fatuk-murak empeñu nian lori ita atu fó an tomak ba ita-nia objetivu sira, maibé tanba ema nunka moris mesak maibé presiza ema seluk importante mós kompromisu atu fó an 100% ba ema seluk, habiit ema seluk, serví ema seluk, sira ne’ebé serbisu hamutuk ho ita importante liu. Kompromisu presiza konsisténsia, presiza dixiplina, presiza haka’as an ho modu kontínuu.
5. Kbiit determinasaun nian (the power of determination). Ita presiza loke fatuk-murak determinasaun nian atu ba oin iha moris. Susesu ohin loron nian la signifika sei hetan nafatin susesu, nune’e presiza haka’as an no prontu hasoru dezafiu. Insusesu ohin la signifika katak aban mós iha insusesu. Enkuantu sei iha entuziazmu atu hadi’ak an no iha objetivu atu to’o, susesu sei hein nafatin ita. Insusesu mak formasaun ida. Insusesu mak adubu susesu nian. Insusesu hahoris susesu.   Einstein dehan “in the middle of difficulty lies opportunity”, katak difikuldade sai oportunidade ba susesu. Never give up! Se ita mamar ho an rasik moris sei sai toos ho ita; maibé se ita toos ho an rasik moris sei mamar ho ita.   Importante la’ós dala hira ita monu  no la konsege, maibé liuliu ita-nia haka’as an no hamriik filafali. Keta ta’uk atu terus, tanba terus sira mak hanorin ba ema signifikadu fafurak valór moris nian. Aleinde ne’e sai ema espirituál, fiar ba kbiit espirituál, kbiit orasaun nian. Ita-nia susesu iha mós Maromak nia liman. Haka’as an no orasaun la’o hamutuk atu halo susesu konkretu.