Laga – Loron Na’i-Feto Rozáriu nian, 7 Outubru, Irmán na’in tolu, Ermelinda Gomes, Ermelinda da Silva no Áurea Freitas hili atu selebra jubileu “osan-mutin” sira-nia konsagrasaun relijioza ne’ebé loloos, halo iha loron 23 Maiu 1994.

Sira-nia preparasaun ba selebrasaun jubileu ne’e hahú ho retiru iha Filipinas hamutuk ho sira-nia “batch” ba semana ida iha semana ikus fulan Jullu 2019. Retiru ne’e sai momentu atu “agradese Maromak”, avalia moris rasik no hafoun fali entuzizmu hanesan domin dahuluk nian.

Selebrasaun hahú ho Eukaristia preside husi P. Apolinário Neto SDB, konselebra ho amlulik salezianu 15 no diosezanu ida. Iha omilia, Padre Apolinário, komenta leitura dahuluk leitura “Cântico dos cânticos” dehan, “Maromak marka tiha ona nina domin iha sira-nia fuan, sira-nia laran, sira-nia moris”. Domini da-ne’e Maromak kuda tiha ona iha sira-nia fuan, no sira deskobre domini da-n’e hodi hatán ba “tinan 25”, hodi moris iha domin “iha foin-sa’e sira nia leet, iha sosiedade, iha komunidade nia laran”. “Domin” mak sinál Maromak tau iha sira. Domin ne’e iha nia naran, “Jezús”, ne’ebé hanesan S. Paulo dehan, buat seluk la folin ona, tan hetan rikusoin boot liu ida-ne’e. “Sira nia esperiénsia ‘zaman dulu’ liu ona; agora liutiha tinan 25 sira esperiénsia ‘zaman now’, tuir linguajen foin-sa’e sira-nian”. Padre Apolinário komenta katak, “moris iha vida konsagrada ba tinan 25 halo sira-nia oin furak nafatin, midar”. Ne’e la dehan katak sira la hasoru dezafiu ka difikuldade, maibé, katak iha buat sira-ne’e nia laran sira “sente Maromak hamutuk ho sira”.  Konsagrasaun ne’e ba misaun, ba foin-sa’e sira nia salvasaun, ne’e mak buat ne’ebé Jezús dehan: “Ha’u mai atu sira moris no moris naresin”, no hanesan Nia sai “Bibi-Atan Di’ak” ne’ebé entrega an ba bibi sira.

Remata Santa Missa, iha almosu konfraternizasaun no konvíviu iha komunidade Laura Vicuña. Durante konvíviu, foin-sa’e sira hato’o dansa, knananuk no espresa ksolok gratidaun ba Maromak ba ninia bolun no fidelidade. Aleinde ne’e, Padre Salezianu sira mós partisipa ho knananuk ida, no husi família, iha señora Elle husi Buibau ne’ebé hato’o knananuk hodi enkoraja nafatin Irmán sira iha sira-nia dalan.

Ir Alma Castagna iha festa nia rohan hato’o lia-menon rua: ida ba Irmán jubilár sira no ida ba ema prezente sira.

Ba sira-selebrante jubileu na’in tolu nia ko’alia kona-ba sira-nia símbolu “trigu”. Nia dehan: “Trigu loloos” mak “trigu ne’ebé ema dulas didi’ak, halo rahun no halo paun”. Entaun mensajen mak ne’e: “ohin imi temi difikuldade, terus, imi-nia dalan to’o iha-ne’e via-sakra ida ka oinsá, ha’u la hatene. Maibé, iha dalan hotu – ha’u hanoin katak kaben-na’in sira mós liu husi difikuldade, terus – maibé ita-nia objetivu iha dalan ida-ne’e mak ‘fó han ba foin-sa’e sira’, sai ‘paun’ ba foin-sa’e sira. Bainhira ita konsege ‘harahun uitoan’ ita-nia an, ita konsege ita-nia objetivu”. Nia taka hodi dehan ba Irmán na’in tolu: “Bá oin haksolok hanesan ne’e”.

Mensajen ba ema seluk, liuliu foin-sa’e sira. Ir Alma hahú hodi “kaer liafuan” husi mana ida Buibau nian ne’ebé dehan katak “Madre Ermelinda hanesan viveiru”. “Viveiru buras, fó fuan?” Nune’e, nia husu: “Vokasaun husi Buibau na’in hira, depoizde Ermelinda da Silva?” Ir Alma hatutan tan: “Momentu sira-ne’e, festa sira-ne’e furak, se ita ida-idak dehan, ‘sira na’in tolu ne’e fiél ba sira-nia vokasaun ba tinan barak. Be ha’u fali? Ha’u fali se katuas, ferik, kaben-na’in ka saida, ha’u fiél ba buat ne’ebé Maromak husu maiu ha’u, ba Maromak nia projetu ka lae? Ha’u foin-sa’e, ha’u hatene ona Maromak nia projetu ka seidauk?” Nune’e, hodi hatudu ba labarik-oan ida, nia dehan “Se seidauk, viveiru mak ne’ebá”. Ir Alma konvida foin-sa’e sira “atu barani dehan ‘sim’ ho fuan tomak ba Maromak. La’ós de’it sai Irmán, sai Padre… maibé mós, se imi hili vokasaun kazamentu nian – kazamentu mós vokasaun – imi halo buat ne’e nu’udar prezente ba Maromak, ho fuan no domin tomak”.