Dili –  Karidade mak asaun ida ne’ebé ema halao hodi hatudu nia laran diak no domin ba ema seluk ne’ebé presiza nia tulun. Nu’udar Edukadora, ita nia knaar mak atu tulun labarik no foinsae sira atu hatene hatudu domin Ba Maromak, ba an rasik no ba ema seluk ne’ebé sira hasoru iha sira nia dalan moris nian.

Nune’e hamutuk ho labarik sira iha Oratorio S. Joao Bosco Balide halao akto karidade ba ema moras sira ne’ebé presiza tulun husi sira. Durante tempu Kuaresma oferese osan ne’ebé sira iha ( 0.5 cent, 0.10…..) hodi tau iha “ Kaixa Karidade ”  nian, hafoin iha semana dalimak, loron Tersa feira; loron 15, ne’ebé hahu Novena ba Maria Auxiliadora no Hrs; 15:00, Animadores Afonso, Cirilo, Cornelio, Viktor, Angela, Jacinta, Dominaria no Ir. Dolores Fma ba hodi labarik Oratorio nia naran Vizita Avo Feto nain rua ( Isin Maten/ Stroke no ida fali oan laiha no hela mesak ho subrinha).

Familia sente haksolok tebes ho Prezensa foinsae no Irman nian ne’ebé Vizita sira. Ba sira sente ida ne’e mak Maromak nia prezensa iha sira nia uma no moris, sira mos husu atu kontinua reza ba sira nia saude. Hafoin ami koalia oituan ho sira, hananu hamutuk, hafoin entrega sasan ruma ne’ebé prepara ba sira ( aihan no sabaun) no ikus liu Reza hamutuk ho sira. Ho esperensia ida ne’e fo hanoin ida ba animadores sira katak, laos deit ba halo vizita iha tempu forte ne’e maibe diak liu se halo nafatin kaixa karidade ne’e no hamutuk ho Grupo sira Asosiasaun nian atu kontinua halo aksaun ne’e iha kiak sira nia uma no ne’e mos bele tulun labarik no foinsae sira sai laran luak hodi fahe  sira nia sasan ne’ebé sira iha.