“Ha’u lakohi sai santa sorin de’it, ha’u hili tomak”
Santa Teresa do Menino Jesus moris iha Alençon (França) iha 1873 no mate iha tinan 1897. Santa Teresinha la deskobre de’it katak iha Kreda nia fuan ninia vokasaun mak domin, maibé mós nia hatene katak ninia fuan – no ita hotu nian – halo ba domin. Nia moris iha família modesta no hamta’uk Maromak, nia aman no inan (Luís no Zélia) iha oan na’in ualu molok Teresa: na’in haat mate ho ki’ik-oan no sira ne’ebé moris mak Santa ne’e nia bin-alin na’in haat (Maria, Paulina, Leônia no Celina). Teresinha tama ho tinan 15 iha Mosteiru “Carmelitas” nian iha Lisieux, hodi Amu-Papa Leão XIII nia autorizasaun. Nia moris hala’o iha haraik-an, simplisidade no konfiansa iha Maromak.
Jestu no sakrifíisu hotu, husi ida ki’ik liu to’o ida boot liu, nia oferese ba Maromak ba klamar sira nia salvasaun no ba Kreda nia intensaun. “Santa Teresinha do Menino Jesus e da Sagrada Face” nian, sai hanesan labarik ida ba Aman, livre, hanesan brinkedu ida iha Kosok-Oan Jezús nia liman (Menino Jesus) no, husik Espíritu domin hanorin nia dalan santidade ida ne’ebé furak no posivel: “infância espiritual”.
Buat ne’ebé nia fuan hakarak liu mak sai misionária “husi kriasaun mundu nian to’o ninia remata”. Nia moris husik mai ita nu’udar proposta, haksumik iha ninia autobiografia “História de uma alma” no, nu’udar intersesora misionáriu amlulik sira nian no sala-na’in sira ne’ebé la hatene Jezús, ohin-loron sei kontinua, husi Lalehan, halo di’ak ba rai ne’e.
Nia mate ho moras tuberkuloze (me’ar raan), ho idade 24 de’it, iha 30 Setembru 1897 hodi fó sai ninia liafuan ikus sira-ne’e: “Oh!…ha’u hadomi Nia. Ha’u Maromak,… ha’u hadomi Ita!”
Depoizde nia mate, ema publika ninia hakerek sira. No mai udan ai-funan roza sira-nian no grasa oioin sira. Ninia beatifikasaun iha tinan 1923, kanonizasaun iha 1925no deklarasaun nu’udar “Patrona Universál Misaun Katólika sira-nian” iha 1927, husi Amu-Papa Pio XI. No iha 19 Outubru 1997, Amu-Papa S. João Paulo II proklama “Santa Teresa do Menino Jesus e da Sagrada Face”, doutora Igreja nian.
Santa Teresinha do Menino Jesus, harohan mai ami!
