Baucau – Retiru molok festa boot Páskua mak tempu propísiu atu reflete kona-ba ita-nia an, ita-nia pozisaun iha Jezús nia oin. Ita sai sarani ba tempu kleur ona, oinsá mak ita moris ita-nia tatuir Kristu nian? Ne’e mak pontu relfesaun nian ba retiru hamutuk FMA no leigu sira, komunidade edukativa iha Baucau, eh komunidade FMA S. Teresa d’Avila iha loron 16 Abríl.

 

Retiru hahú hodi rona filafali Evanjellu Paixaun Jezús nian no reflete Amu-Papa nia liafuan sira iha omilia Domingu Ramus nian: “Ha’u sé loos iha Jezús ne’ebé sofre nia oin?”. Konfronta an ho personajen oioin iha drama Jezús nia terus nian hanesan Pilatos, Pedro, Judas, Maria Virjen, feto sira, povu sira, farizeu sira, nst…ida-idak buka halo ezame konxiénsia kona-ba sira-nia moris sarani nian, iha ninia relasaun ho Maromak no maluk sira. Keta ha’u mak Judas, Pedro, ema lubun-boot…, iha ha’u nia atitude no hahalok sira?

Hafoin irmán no membru sira komunidade edukativa nian reflete mós kona-ba ezemplu ne’ebé santa Bárbara fó ho ninia moris rasik.Hodi hateke ba S. Bárbara, sira buka haree oinsá sira moris sira-nia fiar iha koerénsia no obediénsia ba lialoos hodi fó sasin nu’udar oan, nu’udar ema ne’ebé iha responsabilidade iha superór nia oion no nu’udar fiar-na’in.Atu halo ne’e sira haree “filme Santa Barbara”. Atensaun fó liuliu ba obediénsia. Filme ida ne’e hatudu virtude ida ne’e tuir aspetu tolu: obediénsia nu’udar oan, obediénsia nu’udar soldadu, obediénsia nu’udar ema fiar na’in.

Kona-ba obediénsia nu’udar oan, foufoun Bárbara halo tuir buat hotu ne’ebé nia aman husu, maski dala ruma susar ba nia (ez: bainhira nia aman husu fali nia inan nia brinkus), maibé  neineik, Bárbara aprende atu “tetu” buat ne’ebé nia aman husu, no atu avalia tuir kritériu lialoos nian no nia komesa atu la tuir buat hotu ne’ebé nia aman manda.

Kona-ba obediénsia nu’udar soldadu, iha filme ita haree la’ós de’it obediénsia nu’udar soldadu ida ba ninia estadu, maibé iha aspetu fidelidade nian ba Impériu, ba Roma, no ba sira ne’ebé reprezenta estadu. Obediénsia ida ne’e la iha “hanoin”, hanesan Marciano dehan ba Claudio: “Ó-nia dever nu’udar soldadu mak obedese ha’u”. Iha obediénsia ida ne’e, ema tenke halo tuir hodi la husu buat ida, hodi la hanoin se buat ne’ebé emboot manda loos ka la’e: tenke halo tuir de’it!

Kona-ba obediénsia nu’udar fiar-na’in, sarani sira hakotu atu la oferese sakrifísiu ba Imperadór no atu la halo tuir buat ne’ebé Marciano husu, tan sira-nia fiar. Sira fiél ba buat ne’ebé sira promete no sira komprende katak atu moris nu’udar sarani tenke metin (halo tuir) iha Maromak nia hakaran, maski difikuldade ka terus. Sira hatudu buat ne’ebé S. Pedro hateten ba na’in ulun sira iha Apóst. 4,19: “Iha Maromak futar oin, imi hanoin ba: ami halo tuir imi-nia haruka hodi la halo tuir Maromak, ne’e loos ka lae”!

Momentu daruak mak selebrasaun perdaun nian ho sakramentu konfisaun ho padre David nia prezensa nu’udar ministru Maromak nia rekonsiliasaun nian. Hafoin remata ho Eukaristia selebra husi padre Agnelio, nu’udar agradesimentu ba Maromak nia domin no laran-sadia. . Iha ninia omilia, padre Agnelio mós foka kona-ba reflete ita-nia pozisaun iha Jezús nia terus nia oi.

Momentu ikus retiru nian taka ho “merenda-cena” hamutuk.