Dili – Grupu dahaat FMA TIN hahú ninia retiru anuál ohin, 29 Setembru 2019. Pregadór mak padre Andrew Wong SDB ne’ebé oras-ne’e hala’o knaar iha Indonesia nu’udar Provinsiál. Retiru hahú ho introdusaun husi Provinsiál FMA, Alma Castagna ne’ebé, sita Kardeál Martini (matebian) hateten katak la’ós importante “tópiku” maibé “rona, lee, reflete, reza no komunika fiar”. Nune’e nia subliña atitude ruma hanesan silénsiu, sinseridade, dixernimentu, agradesimentu. Iha tempu grasa nian ida-ne’e, ita buka halo konfrontu no ema ne’ebé gia ita, basá hanesan S. Bernardo hateten, “sé mak sai mestre ba an rasik nia sai dixípulu beik-teen ida”.  Objetivu retiru nian mak sai buras iha konformasaun ho Kristu ne’ebé mate no moris-hi’as.

Santa Missa atu loke reitru selebra husi Padre Andrew no konselebra husi Padre João Roque SDB, ne’ebé partisipa mós iha retiru ho Irmaun Raimundu. Aleinde ne’e iha mós Irmán na’in rua husi Uailili.

Iha omilia, Pe.Wong komenta leitura sira Domingu XXV nian, liuliu Evanjellu Lucas kona-ba ema riku no ema kiak Lázaro, nia husu: “Saida mak evanjelista hakarak hato’o mai ita? Nia dehan katak enkuantu sei moris iha rai ne’e ita presiza hala’o didi’ak nia basá bainhira mate “tempu la iha ona… its too late! Sudah terlambat!” Mate ona, ita labele ona muda, tempu la iha ona, tamba “iha ona eternidade”. Se la iha tempu, “ita aproveita halo di’ak agora liuliu ba ema sira ne’ebé presiza”. Nune’e, Padre Wong konvida atu “ezamina, haree oinsá ita-nia moris iha komunidade, iha sosiedade, liuliu hosi sira ne’ebé presiza”. Basá, “tentasaun ba ema sira ne’ebé moris di’ak mak atu haree de’it ninia an, taka iha an rasik no haluha nia maluk sira”. Padre Wong subliña aspetu “relasionál”, halo relasun di’ak ho ita-nia maluk sira.

Nia taka omilia ho pergunta ida: “Dalabarak ita serbisu, serbisu, halo apostoladu barak ba foin-sa’e sira atu sai famozu, maibé, oinsá ita-nia relasaun ho ita-nia maluk sira?”

Retiru sei remata iha 6 Outubru 2019.