Papa Francisco nia omilia iha Domingu Ramus

 

Semana ne’e hahú ho prosisaun festiva ho ramus oliveira nian: povu tomak simu Jezús. Labarik sira hananu, hahí Jezús.

 

Maibé semana ne’e bá oin ho mistériu Jezús nia mate no moris-hi’as. Ita rona Na’i nia paixaun. Sei halo di’ak mai ita halo pergunta ida: ha’u sé loos? Ha’u sé loos iha ha’u-nia Na’i nia oin? Ha’u sé loos iha Jezús nia oin ne’ebé tama ho festa iha Jerusalém? Hau iha kapasidade atu esprime ha’u-nia ksolok, hahí Nia? Ka foti distánsia? Ha’u sé loos iha Jezús ne’ebé sofre nia oin?

Ita rona naran barak, naran barak. Grupu lider sira nian, amlulik balun, farizeu balun, mestre lei nian balun, ne’ebé deside oho Nia. Sira hein oportunidade atu kaer Nia. Ha’u mak sira ne’e ida?

Ita mós rona naran seluk: Judas. Osan tolunulu. Ha’u hanesan Judas? Ita rona mós naran selseluk tan: eskolante sira ne’ebé  la komprende buat ida, ne’ebé dukur bainhira Na’i terus. Ha’u nia moris dukur hela? Ka ha’u hanesan eskolante sira, ne’ebé la komprende katak sá fa’an Jezús? Hanesan eskolante ida seluk ne’ebé hakarak rezolve buat hotu ho surik: ha’u hanesan sira? Ha’u hanesan Judas, ne’ebé finje hadomi no rein Mestre atu entrega Nia, atu fa’an Nia? Ha’u traidór? Ha’u hanesan líder sira ne’ebé ho lais halo tribunál no buka sasin falsu sira: ha’u hanesan sira? No bainhira ha’u halo buat sira-ne’e, se ha’u halo, ha’u fiar katak ho ne’e ha’u salva povu?

Ha’u hanesan Pilatos? Bainhira ha’u haree katak situasaun sai difisil, ha’u fase ha’u-nia liman sira no la hatene asume ha’u-nia responsabilidade no husik kondena – ka ha’u mak kondena – ema sira?

Ha’u hanesan ema lubun-boot ne’ebé la hatene didi’ak se sira iha reuniaun relijioza, iha julgamentu ida eh sirku ida, no hili Barrabás? Ba sira hanesan de’it: diverte liután, atu hatuun Jezús.

Ha’u hanesan soldadu sira ne’ebé kaer Na’i, tafui ba Nia, insulta Nia, diverte an hodi hatuun Na’i?

Ha’u hanesan Sireneu, ne’ebé fila husi serbisu, kole, maibé iha vontade di’ak atu tulun Na’i lori krús?

Ha’u hanesan ema sira ne’ebé liu husi Krús oin no halo pouku ba Jezús: “Nia barani loos! Tuun husi krús no ami sei fiar iha Nia”. Halo pouku ba Jezús…

Ha’u hanesan feto barani sira, no Jezús nia Inan, ne’ebé hela iha ne’bá, terus iha silénsiu?

Ha’u hanesan José, eskolante subsubar nian, ne’ebé lori Jezús nia isin ho domin, atu lori ba hakoi?

Ha’u hanesan Maria na’in rua, ne’ebé hela metin iha rate oin hodi tanis, hodi harohan?

Ha’u hanesan líder  sira ne’ebé iha loron tuirmai bá Pilatos atu dehan: “Nia dehan katak Nia sei moris hi’as. Atu keta sai lia-bosok ida tan!”, no bloka moris, bloka rate atu defende doutrina, atu moris la sai mai li’ur?

Ha’u-nia fuan iha ne’ebé? Ha’u hanesan ho ema ida ne’ebé loos? Atu lia-husu ne’e akompaña ita durante semana tomak.