Husi Ir Elizita fma

 

Dili – Tempu kuarezma mak tempu ne’ebé forte ba sarani sira atu prepara didiak sira nia moris espirituál molok tama ba Festa boot Páskua. FMA hotu iha komunidade Timor-Leste nian, tulun pároku sira iha preparasaun ba festa ne’e, liuhusi retiru molok sarani sira hakbesik ba sakramentu Rekonsiliasaun.

 

Iha loron 10/04/2014 irmán sira husi komunidade novisiadu: novisa no madre sira a prega retiru ba sarani sira iha komunidade moris foun Centru C iha paroquia komoro. Tema ne’ebé ami fó mak koalia kona ba Amu-Papa Francisco nia mensajen ba tempu Kuarezma nian : “Halo – an kiak atu Nia hariku ita ho Ninia pobreza.” Iha retiru sarani barak mak partisipa; labarik, joven no inan aman. Hodi haree sira nia prezensa hatudu katak sira iha preukupasaun boot ba sira nia klamar. Depoizde retiru iha ritu penitensiál, Iha mós konfisaun. Padre salezianu sira nafatin disponivel iha tempu forte hanesan ne’e no taka ho Selebrasaun Eukaristia Santa ne’ebé prezide husi Amu Pároku.