Papa Francisco iha Angelus – 6-04-2014

 

«Maun no biin-alin sira, bondia!

Evanjellu domingu Kuarezma ne’e nian haktuir Lázaro nia moris-hi’as. Ne’e mak tutun “sinál” boot sira Jezús halo: jestu boot ida, Maromak nian duni ne’ebé amlulik-boot sira la tolera, ne’ebé foti desizaun atu oho Jezús (kf. Jo 11, 53).

Lázaro mate liu loron tolu ona bainhira Jezús to’o; ba nia feton sira Marta no Maria Nia hateten liafuan sira ne’ebé grava ba nafatin iha komunidade sarani nia memória. Jezús dehan nune’e: “Ha’u mak moris-hi’as no moris. Ema ne’ebé fiar ha’u, maski mate nia sei moris. No ema hotu ne’ebé fiar Ha’u, nunka mate” (Jo 11, 25). Kona-ba Na’i nia Liafuan ne’e ita fiar katak ema ne’ebé fiar iha Jezús no tuir Ninia ukun-fuan mate tiha nia sei nakfilak ba moris foun, nakonu no imortál. Hanesan Jezús moris hi’as ho nia isin, maibé la fila ba moris rai nian, nune’e mós ita sei moris hi’as ho ita-nia isin ne’ebé sei nakfilak iha isin glória nian. Nia hein ita hamutuk ho Aman iha Espíritu Santu nia kbiit, ne’ebé halo Nia moris hi’as, sei halo moris hi’as mós ema ne’ebé hamutuk ho Nia.

Iha nia belun Lázaro nia rate nia oin, Jezus “hakilar ho lian maka’as: Lázaro, sai mai liur”. Matebian ne’e sai, ho liman no ain kesi ho hena mate nian no oin taka ho hena ida (vv. 43-44). Hakilar ne’e mak’as ho kbiit no dirije ba ema ida-idak, tanba ita hotu marka ho mate, ita hotu; ne’e mak Lian husi nia ne’ebé Na’i no hakarak atu ema hotu “hetan moris naresin” (Jo 10, 10). Kristu la monu tuir de’it rate sira ne’ebé ita harii mai ita ho ita-nia hilin sira aat no mate nian, ho ita-nia erru sira, ho ita-nia salan sira. Nia la tuir de’it ho ne’e! Nia konvida ita, kuaze fó orden, atu sai husi rate ne’ebé ita-nia salan sira hamout ita bá. Nia bolu ita ho insisténsia atu sai husi nakukun dadur nian ne’ebé ita taka an bá, hodi haksolok ho vida falsa, egoísta, medíokre. “Sai mai liur!”, Nia dehan, “Sai mai liur!”. Ne’e konvite furak ida ba liberdade loos, atu husik Jezús nia liafuan ne’ebé ohin repete mai ita ida-idak atu hakohak ita. Konvite ida atu husik ita sai livre husi “talin sira”, talin sira foti-an nian. Tanba foti-an halo ita sai atan, atan ba ita-nia an rasik, atan ba maromak falsu barak, sasán barak. Ita-nia moris-hi’as hahú iha-ne’e: bainhira ita deside atu obedese Jezús nia orden hodi sai ba naroman, ba moris; bainhira husi ita-nia oin monu sai máskara sira – dala barak salan sira taka máskara mai ita, máskara sira tenke monu! – no ita hetan fali barani ita nia oin orijinál nian, kria tuir Maromak nia ilas no lalatak.

Jezús nia jestu ne’ebé halo Lázaro moris hi’as hatudu to’o iha ne’ebé bele Maromak nia grasa bele to’o no mós to’o iha ne’ebé ita-nia konversaun, ita-nia mudansa. Maibé imi rona mai: la iha limite ba Maromak nia laran-sadia ne’ebé oferese ba ema hotu! La iha limite ida ba Maromak nia laran-sadia ne’ebé oferese ba ema hotu! Imi hanoin didi’ak fraze ida-ne’e. No se ita bele dehan hamutuk: “La iha limite ida ba Maromak nia laran-sadia ne’ebé oferese ba ema hotu”. Na’i prontu nafatin atu hasai fatuk ita-nia salan nia rate nian, ne’ebé haketak ita husi Nia, ema moris nia roman».

 

Hotu tiha Angelus Pap Francisco oferese Evanjellu ba sarani sira iha Prasa S. Pedro.